Дьокуускайга пиибэ иһээри маҕаһыыны халаабыттар

«Дьокуускайдааҕы» ИДьМ 3 №-дээх полициятын отделын дьуһуурунай чааһыгар бородуукта маҕаһыынын үлэһитэ үҥсүү түһэрбит. Кини кэпсииринэн, маҕаһыын саалатыттан икки биллибэт дьон аһаҕастык икки дьааһык пиибэни уоран куоппуттар.

Холуобунай  ирдэбил үлэһиттэрэ уорбаланааччылары быһаарбыттар. Кинилэр бииргэ олороллоро быһаарыллыбыт: Горнай улууһуттан төрүттээх 33 саастаах эр киһи уонна Уус Алдан улууһуттан төрүттээх, урут маннык  буруйу оҥорууга сууттана сылдьыбыт 37 саастаах дьахтар.

Силиэстийэҕэ биллибитинэн, дьахтар эрдэ маҕаһыыҥҥа үлэлии сылдьыбыт. Бастаан кини атыыһыт аралдьыйбытын туһанан, биир дьааһык пиибэни уорбут. Оттон сарсыҥҥы күнүгэр эр киһитин кытта кэлэн, дьон көрөн турдаҕына аһаҕастык икки дьааһык пиибэни уоран ылбыттар. Маҕаһыын үлэһитэ кинилэри тохтото сатаабыт да, уоруйахтар табаары былдьаан баран куоппуттар. Уорбут пиибэлэрин испиттэр.

«Бу чахчынан РФ Холуобунай кодексатын 161-с ыстатыйатын 1 уонна 2 чаастарынан (аһаҕастык халааһын) холуобунай дьыалалар тэрилиннилэр. Буруйдаахтар оҥорбут хоромньуларын  төлөөтүлэр. Силиэстийэ барар», — диэн Саха Өрөспүүбүлүкэтин ИДьМ пресс-сулууспата иһитиннэрэр.