Дьокуускайга Саха сирин уонна Бурятия тимир уустарын «Быһах ДНК-та» быыстапка арылынна

Дьокуускайга бастакытын икки биллиилээх уус – Саха сириттэн Роман Петров уонна Бурятияттан Жигжит Баясхаланов үлэлэрин түмпүт быһах быыстапката арылынна. Уус-уран оҥоһукка тэҥнээх быһахтар өрөспүүбүлүкэ Национальнай художественнай түмэлигэр туруорулуннулар.

Икки уус ыаллыы, ол эрээри тус-туспа култуура уонна тимири уһаныы хайысхатын бэрэстэбиитэллэрэ буолан, бэйэлэрин омуктарын уратытын көрдөрөллөр. Быыстапкаҕа кэлбит дьон икки улуу уус быһах ускуустубатын хайдах көрөллөрүн уонна ону быһах быһыытыгар-таһаатыгар хайдах тиэрдибиттэрин көрөр кыахтаахтар.

— «Бу экспозиция эр киһи, булт кутун-сүрүн уонна сэрииһит тыынын олус бэргэнник көрдөрөр. Жигжит Баясхаланов бэйэтин оҥоһуктарыгар истиэп көс омуктарын үгэстэрин, кыргыһыы тактикатын көрдөрөр, ону таһынан буддизм бэлиэлэригэр тирэҕирэр буоллаҕына, Роман Петров үлэлэригэр биһиги букатын атын, Саха сирин айылҕатын кэрэтин кытта ситимнээх туругу көрөбүт. Бу — бастан туран, булчут быһахтара. Ол иһин быыстапка олус араастаһыылаах, интэриэһинэй буолан таҕыста, манна хас биирдии быһах бэйэтин ураты устуоруйатын кэпсиир», — диэн Саха сирин Национальнай художественнай түмэлин генеральнай дириэктэрэ Влада Тимофеева эттэ.

Жигжит Баясхаланов — Бурятия үтүөлээх худуоһунньуга, Арассыыйа Худуоһунньуктарын сойууһун уонна Италия сэрии сэбин оҥорооччуларын гильдиятын чилиэнэ. Кини ускуустуба уонна дизайн дьүөрэлэһиитигэр сэдэх быһахтары оҥорор. Орто Азия көс омуктарыгар анаммыт «Сомоҕолоһуу» (Единство), «Хранитель», «Соколиная охота», «Маленький воин» диэн быһах композициялара дириҥ ис хоһоонноохтор уонна ураты көстүүлээхтэр.

— «Бу бырайыак улахан кэскиллээх диэн саныыбын. Доҕорбор Роман Петровка муҥура суох махталбын биллэриэхпин баҕарабын. Маннык улуу ууһу кытта биир былаһааккаҕа кыттарбыттан олус киэн туттабын», — диэн Жигжит Баясхаланов санаатын үллэһиннэ.

«Быһах ДНК-та» («ДНК клинка») диэн быыстапка муус устар 17 күнүттэн бэс ыйын 14 күнүгэр диэри Национальнай художественнай түмэл сүрүн дьиэтигэр бары баҕалаахтары күүтэр.