Дьокуускайга салайар хампаанньа батарыайа тоҕо баран оҕо итии ууга буспутун иһин төлүөҕэ

Саха сирин Үрдүкү суута “Губинскай ОДьКХ” салайар хампаанньаттан оҕо ууга буспутугар тиэрдибит хомунаалынай саахал иһин ирдэбили өйөөтө.

Суут бастакы инстанциятын уурааҕа оннунан хаалла.  Бу туһунан суут пресс-сулууспата иһитиннэрэр. 2025 сыл кулун тутар ыйга Дьокуускайга Дзержинскэй уулуссаҕа ититии радиаторын холбуур пробката тэстибит. Онон систиэмэттэн итии уу тоҕо барбыт. Куукунаҕа уу халыйбыт, оттон онно баар оҕо ууга буһан, иккис истиэпэннэх эчэйиини ылбыт.

Ийэ уонна оҕо интэриэстэрин туһугар борокуруор суукка туһаайбыт. Кини салайар хампаанньаттан материальнай хоромньу, эмтэнии уонна сыаналааһын ороскуотун, ону тэҥэ ыстараабы  ирдээн ылары туруорсубут. “Губинскай ОДьКХ” бэрэстэбиитэлэ ирдэбили кытта сөбүлэспэтэх. Кини Хапытаалынай өрөмүөн пуондата эппиэттиэхтээх диэн иһитиннэрбит.

Эппиэттээччи санаатынан, пуонда бэдэрээтчиттэрэ маны кэмигэр оҥорбуттара буоллар, саахал тахсыа суоҕа этэ. Оттон Хапытаалынай өрөмүөн пуондатын бэрэстэбиитэлэ салайар хампаанньаны буруйдаабыт. Кини дьиэни бас билээччилэр ититии магистральнай ситимин көһөрөргө быһаарыы ылыммыттарын эппит. Оттон үлэ болдьоҕо кинилэртэн тутулуга суох биричиинэнэн көспүт. Маныаха кини хапытаалынай өрөмүөн чэрчитинэн бу ыйыллыбыт кыбартыыраҕа турба уларытыллыбатаҕын чопчулаабыт.

Суут уу тоҕо барыытын (залив) биричиинэтэ – дьиэ уопсай баайын-дуолун мөлтөх туруга диэн быһаарбыт. Уопсай баайы-дуолу хааччыйыыга уонна өрөмүөннээһиҥҥэ бары үлэлэр тардылыга суох ыытыллыахтаахтарын, ол эрээри бэйэтин үлэтин ситэтэ суох толорбутун бэлиэтээбит. Дьокуускай куорат суута ирдэбили кытта сөпсөспүт уонна “Губинскай ОДьКХ” материальнай хоромньуну – 143197 солкуобайы, моральнай хоромньу толуйуутун – 50000 солкуобай, эмтэнии ороскуотун – 6118 солкуобайы, сыаналааһын ороскуотун – 8000 солкуобайы, ыстараабы – 71598,5 солкуобайы уонна олохтоох бүддьүөккэ госпошлинаны – 5295,91 солкуобайы төлүөхтээх диэн быспыт. Салайар хампаанньа уурааҕы көтүттэрэ сатаабыт, ол эрээри Саха сирин Үрдүкү суута маныаха төрүөтү булбатах. Бириигэбэр сокуонунан күүһүгэр киирбит.