Дьокуускайга «Сомоҕолоһуу күүһэ» өрөспүүбүлүкэтээҕи бэстибээл үрдүк таһымнаахтык ааста

Кулун тутар 14 күнүгэр Дьокуускай куорат «Кружало» атыы-эргиэн эрээттэригэр Аҕа дойду көмүскээччилэрин өйүүр уонна норуоттар доҕордоһууларын бөҕөргөтөр сыаллаах «Сомоҕолоһуу күүһэ» киэҥ далааһыннаах бэстибээл буолан ааста.

Тэрээһини «Туймаада волонтердара» уопсастыбаннай хамсааһын тэрийэн ыытта. Биир былаһааккаҕа уопсастыбаннай тэрилтэлэр, волонтердар, урбаанньыттар, былаас бэрэстэбиитэллэрэ уонна куорат олохтоохторо түмсэн, байыаннай дьайыы кыттыылаахтарыгар күүс-көмө буоллулар.

Бэстибээл бырагыраамата киэҥ — олохтоох оҥорон таһаарааччылар табаардарын дьаарбаҥката, гуманитарнай көмөнү хомуйар пуун, байыастарга анаан харысхаллары оҥорууга маастар-кылаастар уонна эҕэрдэ кэнсиэр буоллулар.

Тэрээһин сүрүн түмүгэ — фроҥҥа дьиҥнээх көмө буолар: дьаарбаҥка-атыыттан киирбит үп-харчы барыта байыаннай дьайыы кыттыылаахтарын өйөөһүҥҥэ туһуланыаҕа. Бу бэлиэ күн Саха сирин олохтоохторо уопсай сыал туһугар биир сомоҕо күүстээхтэрин өссө төгүл бигэргэттэ.

Чэмэлиинэ Скрябина.