Дьокуускайга суһал мэдиссиинэ көмөтүн аныгы приёмнай отделениетын тутар былааннаахтар

Дьокуускайга эпэрээссийэлиир блоктаах, анестезиология уонна реанимация отделениетын кытта, ону тэҥэ интенсивнай терапия палааталардаах суһал мэдиссиинэ көмөтүн приёмнай отделениетын тутуу былааннанар. Бу эбийиэк Дьокуускай куорат маастар-былаанын чэрчитинэн 2 №-дээх Өрөспүүбүлүкэтээҕи балыыһа — Суһал мэдиссиинэ көмөтүн киинин баазатыгар тутуллуоҕа.

Арассыыйа Бэрэсидьиэнэ Владимир Путин бу дьыл олунньу 18 күнүгэр Бырабыыталыстыба чилиэннэрин кытта мунньахха куораттары былааннааһыҥҥа социальнай инфраструктураны сайыннарыы улахан суолталааҕын бэлиэтээбитэ: «Саҥа микрорайоннары кэлимник тутууну былаанныырга, куораттар уонна нэһилиэнньэлээх пууннар сайдыыларын былааннарын оҥорорго, олохтоохтор социальнай инфраструктураҕа, ону иһигэр мэдиссиинэ тэрилтэлэригэр наадыйыыларын хайаан да учуоттуур наада. Маныаха олоҕуран куораты тутуу бэлиитикэтин тэрийиэххэ, биисинэһи, тутуу хампаанньаларын уонна тутааччылары кытта сөптөөхтүк үлэлиэххэ наада». Бырайыак Дьокуускай агломерациятын 2030 сылга диэри кэлим социальнай-экэнэмиичэскэй сайдыытын уһун болдьохтоох былааныгар киирдэ.

Эбийиэги тутууну 2029–2030 сылларга олоххо киллэрэр былааннанар. 2029 сылга модульнай дьиэни тутууга «Уһун уонна көхтөөх олох» национальнай бырайыак чэрчитинэн федеральнай бүддьүөттэн 616,8 мөл. солкуобай көрүлүннэ.

«Мэдиссиинэ инфраструктуратын сайыннарыы — Дьокуускай куорат 400 сылыгар бэлэмнэнии биир сүрүн сорҕотунан буолар. Биһиги сорукпут — киин куорат олохтоохторугар аныгы мэдиссиинэ көмөтүн, ону иһигэр суһаллык көмөнөн хааччыйыы», — диэн Саха сирин доруобуйа харыстабылын миниистирэ Лена Афанасьева бэлиэтээтэ.

Дьокуускай агломерациятын сайдыытын уһун болдьохтоох былааныгар барыта доруобуйа харыстабылын алта эбийиэгэ, ол иһигэр сыстыганнаах ыарыылар килинииньэскэй балыыһалара, психоневрологическай уонна наркологическай диспансердар, 1 №-дээх поликлиника саҥа куорпуһа уонна эрэгийиэннэр икки ардыларынааҕы реабилитациялыыр киин киирдилэр.

«Биһиги кэмигэр уонна хаачыстыбалаах мэдиссиинэ көмөтүн, ордук суһал түгэннэргэ, ылар кыахтаахпытыттан үөрэбит. Кэнники сылларга Дьокуускайга мэдиссиинэ инфраструктурата сайдар, уонна аныгы мэдиссиинэ тэрилтэлэрэ өссө тиийимтиэ буолбуттара биллэр», — диэн Дьокуускай олохтооҕо Андрей Слепцов бэлиэтээтэ. Маастар-былаан чэрчитинэн мэдиссиинэ инфраструктуратын сайыннарыы суһал көмө тиийимтиэ буолуутун үрдэтиигэ, нэһилиэнньэ доруобуйатын бөҕөргөтүүгэ уонна өрөспүүбүлүкэ киин куоратыгар доруобуйа харыстабылын тиһигин тупсарыыга туһаайыллар.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/66397