Дьокуускайга турнирга эдэр снайпердар кэллилэр

Дьокуускай куоракка сарсыҥҥыттан ыраахтан чопчу ытыыга дьоҕус турнир саҕаланыаҕа. Бүгүн Амур уобалаһыттан, Хабаровскай кыраайтан уонна Еврейскэй автономнай уобаластан эдэр снайпердар номнуо кэллилэр.

Юниордарга аналлаах дьоҕус турнир кыттааччылара бары муһуннулар. Кинилэри сэрэбиэй, төһө ырааҕы ытыахтаахтарын быһаарыы уонна бэлэмнэнии күүтэр, онтон салгыы – күрэскэ тахсыахтара.

Бу дьоҕус турнир Сэбиэскэй Сойуус Дьоруойа Федор Матвеевич Охлопков кэриэһигэр ананар ыраахтан ытыыга турнир чэрчитинэн ыытыллар.

Күрэхтэһиигэ 16-18 саастаах 30-тан тахса оҕо Уһук Илин эрэгийиэннэриттэн кыттар. Кинилэри сэргэ, Приморскай, Камчатка кыраайдарын, Сахалин уобалаһын уонна Бурятия Өрөспүүбүлүкэтин хамаандалара бааллар. Сыаналыыр сүбэҕэ дойду 9 эрэгийиэниттэн «ВОИН» киин 11 исписэлииһэ үлэлиэ.

Күрэхтэһиилэр «Сулус» үөрэтэр-ытар кииҥҥэ ыытыллаллар, бу киин дойдуга биир бастыҥ техническэй параметрдардаах. Эдэр ытааччылар оптическай сыаллаах дьоҕус калибрдаах (5,6 мм) бинтиэпкэлэринэн сыалы ытыахтара.