Дьокуускайга уһулуччулаах учуутал Михаил Алексеев пааматынньыгар сибэкки дьөрбөтүн уурдулар

Алтынньы 5 күнүгэр, Учуутал күнүгэр, Дьокуускай куоракка ССРС норуодунай учуутала Михаил Алексеев сырдык кэриэһигэр сүгүрүйүү уонна пааматынньыгар сибэкки дьөрбөтүн ууруутун сиэрэ-туома буолан ааста. Ураты суолталаах тэрээһиҥҥэ оскуола оҕолоро, учууталлар уонна былаас бэрэстэбиитэллэрэ кытыннылар.

«Михаил Андреевич — номнуо үһүйээн буолбут, ураты дьылҕалаах киһи.  1950–60-с сылларга кини Үөһээ Бүлүү тыатын оскуолатыгар аан дойду таһымнаах өрөспүүбүлүкэҕэ бастакы физико-математическай кыһаны тэрийбитэ. Бу инники күөҥҥэ иһэр оскуола Саха сирин социальнай-экэнэмиичэскэй сайдыытыгар туруулаһан үлэлиир элбэх үрдүк кылаастаах исписэлииһи иитэн таһаарбыта. Оскуола оҕолору кытта хайдах үлэлиирин, кинилэри истэр  ордук суолталааҕын кини үлэтинэн дакаастаабыта. Учуутал идэтэ — көннөрү хамнастаах үлэ буолбатах, бу киһи айылҕаттан анала буолар», — диэн өрөспүүбүлүкэ Бырабыыталыстыбатын бэрэссэдээтэлин солбуйааччы Анатолий Семенов бэлиэтээн эттэ.

Михаил Андреевич Алексеев (1917–1995 сс.) — Саха сирин уһулуччулаах педагога, ССРС норуодунай учуутала, ССРС норуотун үөрэҕириитин туйгуна, РСФСР уонна САССР үтүөлээх учуутала. Кини Саха сиригэр математиканы, физиканы дириҥэтэн үөрэтэр бастакы анал оскуоланы тэрийбитэ уонна өрөспүүбүлүкэҕэ физико-математическай хамсааһыны төрүттээбитэ.