Намҥа эбиэс үүнүүтэ үчүгэй

Ытык Нам нэһилиэгэр  “Сайдыы” ТХПК (салайааччы Александр Александрович Колтовской)  300 гектар иэннээх бааһынаҕа  сүөһүгэ анаан ыспыт эбиэһин хомуйуу үлэтэ   атырдьах ыйын 8 күнүттэн саҕаламмыта.

«Ходоо» бааһынатыгар  бурдугу охсуу үлэтин бэҕэһээ түмүктээбиттэрэ. Бүгүҥҥүттэн бурдук хомуурун үлэтэ саҕаланна.

“Үҥкүүлүүр” бааһынатыгар эбиэһи охсо сылдьаллар.

— “300 гектарга ыһыллыбыт бурдугу хомуйууга барыта биэс тиэхиньикэ быыстала суох үлэлиир. Сүөһү  аһылыгар туһуламмыт үлэ —  эбиэс үүнүүтэ үчүгэй диэн сыаналыыбыт.Бу бэлэмнэммит аһылык сүөһү туругун тупсарар, күүс-сэниэ эбэр.

Бааһынаҕа тиэхиньикэлэр эбиэһи тута рулоннаан иһэллэр. Бурдук хомуурун үлэтэ салҕанар, үлэ түмүгэ санааны көнньүөрдэр, өрө көтөҕөр, өссө күүскэ үлэлииргэ кынаттыыр”, — диэн хомуур үлэтин хаамыытын Нам нэһилиэгин тыа хаһаайыстыбатын исписэлииһэ Виталина Михайлова билиһиннэрдэ.