Эһэлэр тустарынан сымыйа сураҕы, видеолары тарҕатыы административнай эппиэтинэскэ тиэрдэр

СӨ Экологияҕа министиэристибэтин салалтата социальнай ситимнэргэ уонна мессенджердэргэ оруна суох иһитиннэриилэр, видеолар үксээбиттэринэн сибээстээн дьиксинэрин биллэрэр.

Бу матырыйаалларга эһэлэр нэһилиэнньэлээх пууннарга киирэллэрэ, өһүөннээхтик быһыыланаллара уонна дьоҥҥо саба түһэллэрэ көстөр. Маннык сымыйа роликтар үксүлэрин ааптардара Саха сиригэр уһуллубут диэн көрдөрөллөр. Сорох ардыгар маннык туруоруллубут эбэтэр оҥоһуу (генерацияламмыт) видеолары итэҕэтиилээх оҥороору оҥоһуу өй технологиятын тутталлар, ол көмөтүнэн олус дьиҥнээх курдук айан таһаараллар.

«Маннык иһитиннэрии дьону аймыырын таһынан, өрөспүүбүлүкэбит аатыгар-суолугар быһаччы охсууну оҥорон, эһэлэр балаһыанньаларын туһунан сымыйа өйдөбүлү үөскэтэр. Соруйан сымыйа иһитиннэриини тарҕатыы дьон официальнай источниктарга итэҕэйиилэрин мөлтөтөр уонна суһал сулууспалары дьиҥнээх соруктарыттан аралдьытар», – диэн Булт департаменын уонна булт ресурсаларын харыстааһын департаменын салайааччыта Владимир Решетников бэлиэтээтэ.

СӨ Экологияҕа министиэристибэтэ нэһилиэнньэни болҕомтолоох буоларга, бэрэбиэркэлэммэтэх иһитиннэриини тарҕатар саарбах источниктары ааҕартан-көрөртөн туттунарга ыҥырар. Уопсастыбаны долгутар, аймыыр сымыйа иһитиннэриини соруйан тарҕатыы сокуону кэһиинэн ааҕыллар уонна Арассыыйа Федерациятын сокуонугар олоҕуран административнай эппиэтинэскэ тиэрдэр.

СӨ Экологияҕа министиэристибэтин үлэһиттэрэ дьиикэй кыыллар дьоҥҥо тахсыбыт түбэлтэлэрин биллэххитинэ-көрдөххүтүнэ, суһал сулууспалар биир кэлим нүөмэрдэригэр 112 эрийэн биллэрэргитигэр көрдөһөллөр. Иэдээҥҥэ түбэһии туһунан суһал иһитиннэрии эрэ дьиҥнээх кутталтан харыстыыр кыаҕы биэрэр.

Уопсастыбаны долгутар сымыйа тарҕатыы иһин эппиэтинэс Арассыыйа Административнай кодексатын 13.15 ыстатыйатынан көрүллэр («Массабай иһитиннэрэр-биллэрэр эйгэ көҥүлүн туһаныы»).