Эһиилгиттэн үөрэнээччи быһыытын-майгытын иһин сыана туруоруохтара

Эһиилгиттэн, 2027 сылтан үөрэнээччи быһыытын-майгытын сыаналыыр буолуохтара диэн объясняем.рф иһитиннэрэр.

«Үтүө», «сөптөөх», «сатаммат» («образцовое», «допустимое», «недопустимое»)— 2027 сыл балаҕан ыйын 1 күнүттэн дойду бары оскуолаларыгар үөрэнээччи  быһыытын-майгытын итинник сыаналыыр буолуохтара. Бу туһунан РФ Үөрэхтээһин министиэристибэтэ иһитиннэрбит.

Сыананы кылаас салайааччылара, биридимиэттэри үөрэтэр учууталлар уонна педагог-психологтар мунньахтаан бараннар быһаарыахтара. Онуоха кинилэр дисциплинаны, уопсастыбаҕа сыһыаны, киһи бэйэтин хаачыстыбатын уонна үөрэххэ көхтөөх буолуутун учуоттуохтара.

Министиэристибэ бэлиэтээбитинэн, 2026/27 үөрэх дьылыгар бу тиһик бэрэбиэркэлэниэҕэ: маннык сыананы дойду хас биирдии эрэгийиэнин 10-туу оскуолатыгар киллэриэхтэрэ.