Өймөкөөн Куйдуһунугар уулуссалары сырдаттылар

Бу күннэргэ Өймөкөөн улууһун Куйдуһун бөһүөлэгэр эргэ тирэх боруобаттарын саҥардан, уулусса сырдатыытын холбоотулар.

— Ааспыт сайын «Сахаэнерго» АУо уулусса сырдатыытын тирэхтэрэ эргэрбиттэринэн электрическэй боруобаты уонна лаампалары уларытарга, туспа щит уонна фотореле туруорарга быһаарыммыттара. Күһүн бары аналлаах тэриллэри атыылаһан, «Сахаэнерго» тэрилтэ үлэһиттэрэ бу күннэргэ таҥан, үлэҕэ киллэрдилэр. Куйдуһуҥҥа уопсайа 7 сырдатыы тирэҕин туруордулар. Маны таһынан, Томторго умайбыт лаампалары уларытыахтара уонна икки саҥа сырдатыы тирэҕин туруоруохтара. «Сахаэнерго» тэрилтэ кэлэктиибигэр кыстыкка киириэх иннинэ суһал уонна хаачыстыбалаах үлэлэрин иһин истиҥ махталбытын тиэрдэбит, — диэн иһитиннэрдэ Томтор нэһилиэгин баһылыга Айаал Неустроев.