Өймөкөөн улууһун Төрүт нэһилиэгэ: үһүс күнүн уота, сибээһэ суох

Бүгүн от ыйын 29 күнүгэр Өймөкөөн улууһун Төрүт нэһилиэгин олохтоохторо үһүс күнүн электроэнергията уонна сибээһэ суох олороллор. 

Элги өрүс халааннаан, Славка учаастагар баар уот ыстаансыйата ууга тимирбит. Ааспыт ардахтар содулларыттан Алаас, Быйыттаах, Төрүт Алыы учаастактар ходуһалара ууга былдьаннылар. Ити учаастактарга оттуу сылдьар дьону кытта үһүс күнүн сибээс суох.

Бу күннэргэ нэһилиэккэ бэкээринэ үлэлээбэт. Нэһилиэк таһымнаах ыксаллаах быһыы-майгы тахсан, олохтоохтор долгуйан, от ыйын 28 күнүгэр киэһэ нэһилиэк дьокутааттара, тэрилтэлэр салайааччылара, уопсастыбаннас мунньахтаан баран, улуус баһылыгын э.т. А.В. Федотовка, оройуон Сэбиэтин бэрэссэдээтэлигэр Е.А. Кривошапкиҥҥа буолбут ыксаллаах быһыыны-майгыны туоратар миэрэлэри ыларыгар көрдөһөн суругунан туруорсарга быһаарыныы ылыннылар. Мунньах кыттыылаахтара нэһилиэк бэрэстэбиитэллэрин оройуон киинигэр муниципалитет салалтатын кытта көрсүһүүгэ ыытарга быһаардылар.

Индигиир өрүскэ уу таһыма үрдээн эрэрэ билиннэ. Төрүт олохтоохторо Элги уонна Индигиир өрүстэргэ халаан балаһыанньата сытыырхайан эрэриттэн дьиксинэллэрэ оруннаах — Төрүт нэһилиэгэ Өймөкөөн улууһун бу икки улахан өрүһүн икки ардыларынааҕы арыыга турар. Олохтоохтор улуус салалтатын өйдөбүлүгэр уонна көмөтүгэр эрэллэрэ улахан.