Өймөкөөҥҥө көмүс булбут Ингушетия олохтооҕо холуобунай дьыалаҕа тардылынна

Саха сиригэр Ингушетия Өрөспүүбүлүкэтин 50 саастаах олохтооҕор суут бириигэбэрэ таҕыста. Кини Арассыыйа Холуобунай кодексатын 191-с ыстатыйатын 4-с чааһынан буруйдааҕынан билиннэ. Бу туһунан Саха сиринээҕи ИДьМ пресс-сулууспата иһитиннэрэр.

Саха сиринээҕи ИДьМ Өймөкөөннөөҕү отделын силиэстийэлиир бөлөҕө быһаарбытынан, эр киһи Өймөкөөн улууһугар харчылаһа кэлэ-бара сылдьар эбит. 2025 сыл от ыйыгар Аммоналка диэн сиргэ, быраҕыллыбыт булуус таһыттан хара өҥнөөх суулаах айылҕа кумах кыһыл көмүһү булан ылбыт уонна кэлин байар-тайар соругунан бэйэтигэр кистээн хаалларыммыт.

Ол эрээри, босхо баай туһата суох буолла. Кини  «Mitsubishi Lancer» массыынатын ФСБ Саха сиринээҕи управлениетын үлэһиттэрэ «Халыма» федеральнай суол 974-с км тохтоппуттар. Массыынаны бэрэбиэркэлиир кэмнэригэр, бардачоктан быраабы араҥаччылааччылар 505 грамм ыйааһыннаах көмүстээх бакыаты булбуттар.

Эспэртииһэр көрдөрбүтүнэн, бакыакка баар металл — кырдьык кыһыл көмүс эбит, уонна онно 70 грамтан тахса үрүҥ көмүс булкаастааҕа быһаарыллыбыт. Бу сокуоннайа суох тиэйэ сылдьыбыт күндү металлын уопсай сыаната 3,6 мөлүйүөн солкуобайтан тахса буолбут.  Суут уурааҕынан, буруйдаах киһи 2 сыл 6 ыйга болдьоххо усулуобунайдык көҥүлэ быһылынна, ону тэҥэ 2 сыл кэтээн көрүү ананна. Оттон эр киһиттэн былдьаммыт кыһыл көмүс уонна «Mitsubishi Lancer» массыына судаарыстыба туһатыгар былдьанна.