Элбэх хайысхалаах учууталлары үөрэтэллэр

Өрөспүүбүлүкэҕэ, ол иһигэр хоту уонна уһук дэриэбинэлэргэ учуутал тиийбэт кыһалҕатын быһаарар араас суоллары көрдүүллэр. Олортон биирдэстэринэн “Элбэх хайысхалаах учуутал” куурус буолар.

Соторутааҕыта С.Н.Донской-II аатынан Үөрэҕи сайыннарар уонна идэ таһымын үрдэтэр институт “Элбэх хайысхалаах учуутал” (“Многопрофильный учитель”) кууруһу тэрийэн ыытта.

Мэҥэ Хаҥалас улууһун ини-бии Пономаревтар ааттарынан Томтор орто оскуолатын математикаҕа учуутала Дарианна Иванова:

— М.К.Аммосов аатынан Хотугулуу-Илиҥҥи федеральнай университет математикаҕа, информатикаҕа институтун бүтэрбитим. Маҥнай Чыамайыкыга үлэлээбитим, билигин төрдүс сылбын дойдубар Томторго учууталлыыбын. Учуутал буолабын диэн эрдэттэн быһаарыммытым, учууталлыыр төһө үчүгэйий диэн эрдэттэн  ыйыталаһарым. Онон идэбин сөбүлүүбүн.

Үөрэҕи сайыннарар уонна идэ таһымын үрдэтэр институкка “Элбэх хайысхалаах учуутал” кууруска  физика, информатика хайысхаларыгар учууталлары саҥаттан бэлэмниир кууруска үөрэнним. Оскуолабыт 11 кылаастаах, 45 үөрэнээччилээх. Куораттан чугас, кэлэргэ-барарга харгыс суох, онон учууталынан толору хааччыллан олорор. Ол да буоллар хас биирдии киһи үүнэн-сайдан иһиэхтээх, эбии үөрэниэхтээх диэн санаанан салайтаран, бэйэм баҕабынан, төлөөн үөрэнним. Эһиил баччаларга дьупулуоммутун көмүскүөхтээхпит, — диэн эдэр учуутал санаатын үллэстэр.

Афанасий Петров Үөһээ Бүлүү улууһун Өргүөт нэһилиэгиттэн төрүттээх, М.К.Аммосов аатынан Хотугулуу-Илиҥҥи федеральнай университет Мииринэйдээҕи политиэхиньиичэскэй филиалыгар ньиэп, гаас идэтин бүтэрбит.

— Үөрэхпин бүтэрэн баран кылгастык идэбинэн үлэлии сылдьыбытым эрээри, биир-балтараа ый хамнаһы хойутаталлара. Ол иһин Дьокуускайга кэлэн суол тэрилтэтигэр үлэлээбитим. Билигин бэйэм дьарыктаахпын. Сайынын үлэлиирим быһыытынан, дойдум дьоно кыһынын биһиэхэ кэлэн үлэлээ диэн көрдөһөн, Үөрэҕи сайыннарар уонна идэ таһымын үрдэтэр институкка кэлэн үөрэнним. Математика, физика учууталынан барыахтаахпын. Оҕо эрдэхпиттэн бу икки биридимиэти сэҥээрэрим уонна университекка үөрэппит буолан судургу. Физика, математика хайысхатыгар сүүрбэччэбит. Математика, физика, педагогика, психология дьиссиппилиинэлэрин барытын үөрэттилэр, — диэн кэпсиир.