Элбэх оҕолоох аҕа сарсыарда эрдэттэн куоластаата

Балаҕан ыйын 18-20 күннэригэр Госдуумаҕа дьокутааттары талыы быыбара ыытыллар. Бастакы күн сарсыарда эрдэттэн быыбардыыр учаастактар ааннара аһылынна. Дьон эрдэ диэбэккэ, үлэ чааһын иннинэ кэлэн, куоластаан саҕалаатылар. 

Өймөкөөн улууһун дьокутааттарын сэбиэтин салайааччы, элбэх оҕолоох аҕа Евгений Кривошапкин сарсыарда 8 чаас ааһыыта тиийэн, гражданскай иэһин толорон, бэйэтин куолаһын биэрдэ.

— Кэргэммин кытта сарсыарда эрдэ кэлэн куоластаатыбыт. Оҕолорбут бакаа кыралар, куоластаабаттар. Бүгүн биһиги ханнык баартыйаны уонна Саха сириттэн ким Госдуума дьокутаата буоларын талар күммүт, онтон туора туруо суохтаахпыт диэн санаалаах кэлэн куоластаатыбыт.
Быыбар диэн, уопсайынан, олохпут-дьаһахпыт бэйэбититтэн тутулуктаах буоларын быһаарар, ол иһин хайаан да быыбарга сылдьабыт. Дьоҥҥо санаабыккыт барыта туоллун диэн баҕарыа этим, ол эрээри баҕа санаа туолуутугар утары хардыы оҥоруохха наада. Онон иннибит диэки эрэллээхтик хардыылаан иһиэххэ! — диэн Евгений Александрович санаатын үллэһиннэ.

Санатар буоллахха, Евгений Кривошапкин аан дойду саамай үрдүк чыпчаалыгар — Эверест хайатыгар ыттыбыт соҕотох саха киһитэ буолар.

Кини туһунан суруйууну бу сигэнэн киирэн ааҕыҥ:

Сир муҥутуур чыпчаалыгар – саха киһитэ