Элбэх оҕолоох ийэлэр хаһан болдьоҕун иннинэ биэнсийэҕэ тахсыахтарын сөбүй?

Элбэх оҕолоох ийэлэр, ону таһынан инбэлиит оҕолору иитэр төрөппүттэр уонна көрөөччүлэр  (опекуннар) биэнсийэҕэ болдьоҕун иннинэ тахсар бырааптаахтар. Манна ханнык ирдэбиллэр баалларый? Бу туһунан Объясняем.рф. саайт быһаарар.

Биэнсийэҕэ эрдэ тахсарга сүрүн уопсай ирдэбиллэр: оҕолор 8 саастарын туолбут буолуохтаахтар, дьахтар үлэлээбит страховой ыстааһа 15 сылтан кырата суох буолуохтаах, оттон биэнсийэ тус коэффициена (ИПК) — 30-тан итэҕэһэ суох буолара ирдэнэр.

Элбэх оҕолоох ийэлэргэ ирдэбиллэр

Хотугу усулуобуйаҕа (Саха сирин олохтоохторугар ордук сыһыаннаах): 2 эбэтэр онтон элбэх оҕону төрөппүт ийэлэр 50 саастарыгар биэнсийэҕэ тахсыахтарын сөп, өскөтүн:

• Уһук Хоту усулуобуйатыгар 12 сылтан кырата суох эбэтэр онно тэҥнэһэр сирдэргэ 17 сылтан итэҕэһэ суох үлэлээбит буоллахтарына;
• Уопсай страховой ыстаастара 20 сылтан итэҕэһэ суох буоллаҕына.

Уопсай ирдэбилинэн (оҕо ахсаанынан): 3 эбэтэр онтон элбэх оҕолоох ийэлэр (оҕолоро бары 8 саастарын туолбут буоллахтарына уонна ийэ ыстааһа 15 сылтан кырата суох буоллаҕына) биэнсийэҕэ маннык саастарыгар тахсаллар:

• 57 саастарыгар — 3 оҕону төрөтөн ииппит буоллахтарына;
• 56 саастарыгар — 4 оҕолоохтор;
• 50 саастарыгар — 5 уонна онтон элбэх оҕолоохтор.

Инбэлиит оҕолору иитэр төрөппүттэргэ уонна опекуннарга ирдэбиллэр

Оҕо эрдэҕиттэн инбэлиит оҕону 8 сааһыгар диэри ииппит төрөппүттэртэн биирдэстэрэ (ийэтэ эбэтэр аҕата) болдьоҕун иннинэ биэнсийэҕэ тахсар бырааптаах:

• Эр дьон — 55 саастарыгар (страховой ыстаастара 20 сылтан кырата суох буоллаҕына);
• Дьахталлар — 50 саастарыгар (страховой ыстаастара 15 сылтан кырата суох буоллаҕына).

Опекуннарга: Оҕо эрдэҕиттэн инбэлиит оҕону 8 сааһыгар диэри көрбүт-истибит опекун биэнсийэҕэ тахсар сааһа кыччыыр бырааптаах. Ол курдук, опекуннаабыт хас 1 сыл 6 ыйын аайы биэнсийэҕэ тахсар сааһа 1 сылынан көҕүрүүр (ол эрээри уопсайа 5 сылтан ордук көҕүрүө суохтаах). Манна эмиэ туспа страховой ыстаас ирдэнэр: эр дьоҥҥо — 20 сылтан, оттон дьахталларга — 15 сылтан кырата суох буолуохтаах.