Электроннай үлэ киниискэтигэр наҕараадалары киллэриэхтэрэ дуо?

Судаарыстыбаннай Дуума дьокутааттарын бөлөҕө (Ярослав Нилов, Дмитрий Гусев, Нина Останина, Алексей Диденко, Станислав Наумов) үлэҕэ ситиһиилэрин иһин бэриллэр наҕараадалары электроннай үлэ киниискэтигэр киллэрэр туһунан сокуон барылын дьүүллэһиигэ киллэрдэ. Докумуон барыла от ыйын 10 күнүгэр Судаарыстыбаннай Дуума электроннай баазатыгар таҕыста.

Уларытыыны Арассыыйа Федерациятын Үлэ кодексатын 66.1 ыстатыйатыгар киллэрэргэ этии киирдэ. Быһаарыы сурукка этиллэринэн, билиҥҥи туругунан электроннай үлэ киниискэтигэр үлэһит, үлэлиир сирэ, дуоһунаһа, атын үлэҕэ көһүүтэ уонна ууратыллыытын туһунан эрэ дааннайдар киирэллэр. Оттон биһирэбил, наҕараада туһунан суруллубат, ол эрээри кумааҕы киниискэҕэ бу барыта бэлиэтэнэр этэ.

Дьокутааттар санаталларынан, кумааҕы үлэ киниискэтигэр судаарыстыбаннай наҕараадалар, бочуоттаах ааттар, РФ Бэрэсидьиэнин уонна Бырабыыталыстыбатын наҕараадалара, биэдэмистибэннэй, эрэгийиэннээҕи, олохтоох салайыныы уорганнарын уонна Идэлээх Сойуус наҕараадалара киирэллэр. Ону таһынан үлэ биэрээччи биһирэбиллэрэ: бочуотунай кырааматалар, түөскэ кэтиллэр бэлиэлэр, значоктар, дьупулуомнар уо.д.а. суруллаллар.

Сокуон барылын ааптардара бэлиэтииллэринэн, наҕараада туһунан информация электроннай киниискэҕэ суоҕа үлэһиттэри тэҥэ суох балаһыанньаҕа туруорар. Ордук улахан кыһалҕаны 2020 сыл ахсынньы 31 күнүн кэнниттэн бастакытын үлэҕэ киирбит, кумааҕы киниискэтэ суох дьон көрсөр. Кинилэргэ наҕараада туһунан дааннай социальнай өйөбүл сорох көрүҥүн ыларга, чуолаан «Үлэ бэтэрээнэ» ааты иҥэриигэ, улахан суолталаах буолуон сөп.

Сокуон барылын сүрүн сыала — кумааҕы уонна электроннай үлэ киниискэлэригэр киирэр информацияны тэҥнээһин уонна үлэһити наҕараадалааһын суолтатын үрдэтии.

Ол эрээри, РФ Бырабыыталыстыбата ити этииттэн туох да туһа тахсыа суоҕа диэн ааҕар. Кинилэр көрүүлэринэн, Арассыыйа Социальнай пуондатыгар электроннай ньыманан бэриллэр үлэ туһунан сибидиэнньэлэр кистэлэҥ информацияҕа киирсэллэр. Онон наҕараада туһунан дааннайы киллэрдэххэ, ол эмиэ тарҕанарыгар хааччахтаах буолуоҕа. Ону кытта дааннайдар испииһэгин кэҥэттэххэ, пуонда үлэтигэр киирбэт эбии эбээһинэһинэн буолуо уонна информационнай тиһиги саҥардарга үбү-харчыны эбии эрэйиэ диэн Бырабыыталыстыба бэлиэтиир.

Ону сэргэ «Үлэ бэтэрээнэ» ааты иҥэрии РФ субъектарын сокуоннарынан салайыллар, онон федеральнай баазаҕа дааннайы киллэрии эрэгийиэннэр бэрээдэктэрин уларыппат уонна ааты иҥэриигэ мэһэйдэри туоратары мэктиэлээбэт диэн санатар.