Өлүөхүмэ улууһугар отоннуу сылдьан сүппүт дьахтары көрдүүллэр

Өлүөхүмэ улууһугар сүппүт дьахтары көрдөөһүн үлэтэ салгыы  үлэлэр ыытыллаллар. Дьахтар  отоннуу сылдьан сүппүтэ.

Кэргэнниилэр — 1953 сыллаах төрүөх эр киһи уонна 1952 сыллаах төрүөх дьахтар Дэльгэй й сэлиэнньэтиттэн 50 килэмиэтирдээх Сосновка диэн сиргэ мотуордаах оҥочонон  отоннуу барбыттар. Отоннуу  тиийэн баран,  икки аҥы барбыттар. Ол кэнниттэн дьахтар сүтэн хаалбыт. Эр киһи бэйэтэ көрдүү сатаабыт. Кэлин кини кыыһын кытта сибээстэһэн, ойоҕо сүппүтүн эппит.

Дьахтар сүппүтүн туһунан иһитиннэрии балаҕан ыйын 9 күнүгэр Өлүөхүмэ улууһун Биир кэлим дьуһуурунай-диспетчерскэй сулууспатыгар (ЕДДС) киирбит.

Миэстэтигэр СӨ Быыһыыр сулууспатын быыһааччыларын бөлөҕө, салайааччы Максим Колесов айаннаабыт. Бэҕэһээ, балаҕан ыйын 17 күнүгэр, көрдүүр-быыһыыр үлэлэр хас да хайысханан салҕаммыттар: ойууру чинчийэн сыныйан көрбүттэр; тепловизордаах көтөр аппараатынан  үөһэттэн көрбүттэр.