«Энергосбыт» исписэлииһэ Оксана Петрова гиирэ успуордугар — аан дойду чөмпүйүөнэ

«Энергосбыт» Үөдэйдээҕи салаатын исписэлииһэ Оксана Петрова Нью-Дели (Индия) куоракка буолан ааспыт гиирэ успуордун аан дойдутааҕы чөмпүйэнээтигэр кыһыл көмүс мэтээли ылла. Оксана Петрова үһүс төгүлүн аан дойду чөмпүйүөнүн титулун ылла.

Оксана Петрова 68 кг диэри ыйааһыҥҥа «уһун цикл» көрүҥҥэ саарбахтааһына суох кыайыыны ситистэ. 16 кг ыйааһыннаах икки гиирэни тутан, 10 мүнүүтэ иһигэр 62 өрө анньыыны оҥордо. Бу чаҕылхай көрдөрүү кини саҥа тус рекордунан буолла: былырыыҥҥы күрэхтэһиигэ спортсменка 60-на өрө көтөхпүтэ.

Индияҕа аан дойдутааҕы күрэхтэһиилэргэ аан дойду бастыҥ атлеттара кытыннылар. Мэтээл иһин күрэхтэһиигэ дойду хаһаайыттара, ону тэҥэ Австралия, АХШ, Тайвань, Узбекистан, Монголия уонна да атын дойдулар бэрэстэбиитэллэрэ кытыннылар. Чөмпүйүөнү күрэхтэһиигэ бэлэмнээбит уонна помостка арыаллаабыт кини тус тириэньэрэ Елена Иванова.

Маны таһынан, спортсменка хамаанданан зачекка үрүҥ көмүһү аҕалбыт. Оксана Петрова Арассыыйа дьахталларын сүүмэрдэммит хамаандатын састаабыгар бэтэрээннэр эстэпиэтэлэригэр 2-с миэстэни ылла. Үһүс түһүмэххэ тахсан, бэриллибит үс мүнүүтэ иһигэр гирэни 27-тэ өрө аста.

Оксана Петрова өссө төгүл олус күүстээх санаалааҕын уонна маастарыстыбатын көрдөрдө. Бу иннинэ «Сахаэнерго» үлэһитэ быйыл атырдьах ыйыгар Кыргызстан Чолпон-Ата уонна былырыын Кытай Хайнин куораттарыгар аан дойдутааҕы күрэхтэһиилэр үрдүкү үктэллэригэр тахсыбыта.

«Бэлэмнэнии олус үчүгэй этэ. Ол эрээри манна гиирэлэрэ биһиэниттэн ураты, атын көрүҥнээхтэр. Долгуйуу баара, маннык гиирэни өрө анньар уратылаах. Ол эрээри биһиги успуорпутугар сүрүн утарылаһааччы – бэйэҥ эрэ буолаҕын. Бастатан туран, бэйэҕин кыайыаххын наада», — диэн күрэхтэһии кэнниттэн Оксана Петрова санаатын үллэһиннэ.

Биир идэлээхтэрэ Оксана Петрованы уонна кини тириэньэрэ Елена Иванованы бу уһулуччулаах ситиһиилэринэн эҕэрдэлииллэр: «Оксана Петрованы кыайыытынан итиитик-истиҥник эҕэрдэлииби! Чэгиэн доруобуйаны, быстыбат эрчими, тус дьолу, Арассыыйатааҕы уонна аан дойдутааҕы ареналарга саҥа чаҕылхай кыайыылары баҕарабыт!».