Энтеровируһунан ханна сыстыахха сөбүй?

Бассейҥҥа, муораҕа, аквапааркаҕа энтеровирус сыстыан сөп. Энтеровирус үксүгэр биллибэккэ сылдьар, сороҕор ОРВИ курдук буолар. Бу ыарыы ханна баҕарар баарын, сүтэн-оһон биэрбэтин быһыытынан киһи олус судургутук сыстыан сөп диэн Роспотребнадзор иһитиннэрэр.

Энтеровирус сүүрүгүрэр ууга, бассейннарга, аһаҕас ууларга, туттар малга-салга, аһылыкка (үүккэ, фруктаҕа, оҕуруот аһыгар) олус уһуннук сылдьар.

Энтеровирус инфекциятын киһи эрэ тарҕатар: ыарыһах эбэтэр ыарыыны илдьэ сылдьааччы.

Тарҕанар суола: уунан уонна бытовой-ыкса алтыһыынан, эбии тарҕанар суола – тыынар уоргана ыалдьыбыт киһи салгынынан-ытырдыынан, сөтөлүнэн.

Дьон ордук ыарыылаах ууну истэҕинэ, куһаҕаннык сууллубут оҕуруот аһын, фруктаны сиэтэҕинэ, кирдээх илии, оонньуур нөҥүө сыстар.

Энтеровируһунан оҕолор улахан киһитээҕэр элбэхтик уонна ыараханнык ыалдьаллар.

Улахан дьон эмиэ сыстар эрээри, үксүгэр туох даҕаны сибикитэ суох уонна чэпчэкитик аһарар.

Бу ыарыы сибикитэ араас буолар: герпетическэй ангина, көхсүгэ, илиигэ, атахха, сирэйгэ айах диэки ымынах тахсыыта, ис-үөс үлэтин кэһиллиитэ. Маны тэҥэ киһи кыраадыһа тахсыан, сэниэтэ суох буолуон, мунна бүөлэниэн, атын респираторнай ыарыылар сибикилэрэ, төбө, былчыҥ ыарыыта баар буолуон сөп. Энтеровирус саамай кутталлаах көрүҥэ – серознай вируснай менингит.

Ханна ордук сыстыахха сөбүй?

Бассейҥҥа. Өскөтүн бассейҥҥа уу сараасатын суох оҥоруу систиэмэтэ кэһэллибит түгэнигэр киһи ыарыыга судургутук сыстар. Үчүгэйдик хлордаммыт даҕаны ууну ыйыһыннахха ыарыыга ылларыахха сөп.

Аквапааркаҕа. Ордук аһаҕас зоналардаах уонна уулаах аттракционнардаах аквапааркаларга элбэх киһи сылдьарын, уу эргиирин систиэмэтэ мөлтөҕүн быһыытынан киһи дэбигистик ыарыыга сыстар.

Муораҕа. Көҥүлэ суох пляжтарга, ордук дохсун ардахтар кэннилэриттэн уулуссалартан, тэрилтэлэр дьиэлэриттэн уута аллара түһэрин быһыытынан, энтеровируһунан сыстыахха сөп. Уу төһө даҕаны ыраас курдугун иһин, вирус суох диэн мэктиэлиир табыллыбат.

Ыалдьыбат туһугар тугу гынабыт?

Санитарнай өттүнэн ыраас сирдэргэ сылдьыҥ. Уутун, түгэҕин, аттынааҕы миэстэлэри кэмиттэн-кэмигэр көрөр-истэр, ыраастыыр сирдэргэ сылдьыҥ. Пляжка бараргытыгар ыраас уулаах диэн официальнай отчуоттанар сөтүөлүүр сиргэ эрэ харбааҥ.

Тус гигиенаны тутуһуҥ. Тахсан киирэн баран, сынньанар сиргэ тугу эмэ илиигитинэн туттугут да илиигитин мыылалаан суунуҥ. Бэйэҕит тус малгытын эрэ туттуҥ: соттор, тапочка, бэргэһэ. Сытар кириэһилэни бэйэҕит сотторгутунан бүрүйэ быраҕыҥ.

Сөтүөлүүр кэмҥитигэр ууну ыйыстымаҥ.

Уулаах эбийиэктэргэ барыаххыт иннинэ уонна кэлэн баран душтаныҥ.

Соторутааҕыта ОРВИнан ыалдьа сылдьыбыт, аһаҕас баастаах, ыйдааҕыгыт кэлэ сылдьар эбит буоллаҕына бассейны, аквапаарканы, пляһы тохтотон эриҥ.

Оҕолоргутун кыһаллан көрүҥ. Оҕолор ууну ыйыстар уонна микроб концентрацията элбэхтик мустар чычаас ууга оонньуулларын сөбүлүүллэр.

Уулаах сирдэргэ сылдьан баран бэйэҕит эбэтэр оҕолоргут  температуралара, эттэригэр ымынах таҕыстаҕына, күөмэйдэрэ ыарыйдаҕына, истэрин-үөстэрин үлэтэ кэһилиннэҕинэ бэйэҕит эмтии сатаамаҥ, тута бырааска көрдөрүнүҥ.