Эрдэҕэс саастаах уолаттар бэлисипиэттэри уорбуттар

Чурапчы улууһугар полиция үлэһиттэрэ   бэлисипиэттэри уорууга  уорбаланар эрдэҕэс саастаах оҕолору туттулар.

Ис дьыала министиэристибэтин Чурапчы улууһунааҕы салаатын дьуһуурунай чааһыгар дьиэлэрин тиэргэннэриттэн бэлисипиэттэрин уордарбыт икки олохтоохтон сайабылыанньа киирбит. Хоромньу уопсай кээмэйэ 27 000 солкуобай.

Полиция үлэһиттэрэ  сокуоннай саастарын ситэ илик оҕолор дьыалаларыгар иниспиэктэрдэри кытта  уорбаланааччылары  —  16 уонна 17 саастаах олохтоох эдэр дьону буллулар.

Быһаарыллыбытынан, 17 саастаах уол күүлэйдии сылдьан чааһынай дьиэ бүтэйин таһыгар бэлисипиэт  турарын   көрөн,  уоран ылбыт. Онтон атын дьиэ тиэргэнигэр өссө биир бэлисипиэт баарын көрөн,   16 саастаах доҕоругар ону уорарыгар эппит. Онуоха доҕоро тута сөбүлэспит. Уоруллубут бэлисипиэттэринэн уолаттар  бииргэ хатааһылаабыттар.

Билигин уоруллубут мал-сал  уолаттартан ылылынна.

РФ Холуобунай кодексын  158 ыстатыйатын 2-с чааһынан «Уоруу» диэн холуобунай дьыала көбүтүлүннэ.