Өрөспүүбүлүкэ өрүстэригэр уу таһыма үрдүү турар

Бүгүн  сарсыарда   08:00 чаастааҕы туругунан Өлүөнэ мууһа Иркутскай уобалаһынан устар.  Өлүөнэ өрүс Өлүөхүмэттэн Дьокуускайга диэри учаастагар суукка устата уу таһыма  13–43 см үрдээтэ. 

Бу туһунан бүгүҥҥү брифиҥҥэ СӨ экологияҕа, айылҕаны туһаныыга уонна ойуур хаһаайыстыбатыгар миниистирэ  Евгений Перфильев  иһитиннэрдэ.

Бэҕэһээ, ыам ыйын  4 күнүгэр, киэһэ  Забайкальскай кыраай территориятынан Өлүөхүмэ өрүс  мууһа хамсаата.  Өлүөхүмэ оройуонунан муус  ыам ыйын 7-9 күннэригэр эстэрэ күүтүллэр.

Алдан, Уус Маайа,  Томпо улуустарынан Алдан өрүскэ уу таһыма  суукка устата 8-тан  42 см диэри үрдээтэ.  Аммаҕа  сорох сиринэн муус хамсаан эрэр.

Бүлүү, Марха өрүстэргэ уу таһыма үрдүү турар диэтэ миниистир.