Өрөспүүбүлүкэҕэ биэс быраас амбулаторията аһылынна

Бүгүн, алтынньы 22 күнүгэр, өрөспүүбүлүкэҕэ быраас модульнай амбулаториятын биэс саҥа дьиэтин видеонан кэмпириэнсийэ эрэһиимигэр биир кэмҥэ арыйдылар.

Ол курдук, Уус Алдан улууһун Бэйдиҥэ, Үөһээ Бүлүү улууһун Боотулу, Нам улууһун Кириэс Кытыл, Ньурба улууһун Чаппанда сэлиэнньэлэригэр  уонна Дьокуускай куорат Мархатыгар быраас модульнай амбулаториятыгар мэдиссиинэ хаачыстыбалаах көмөтүн ылыахтара.

Биэс амбулатория мэдиссиинэ бастакы көмөтүн оҥорорго аныгы тэрилинэн сэбилэннэ. Эмтэнээччилэргэ уонна үлэһиттэргэ табыгастаах усулуобуйа олохтонно.

“Өрөспүүбүлүкэ хас биирдии олохтооҕо киин куоракка уонна ыраах сытар сэлиэнньэҕэ мэдиссиинэ хаачыстыбалаах көмөтүн ылара улахан суолталаах. 2018 сылтан биһиги Саха сиригэр доруобуйа  харыстабылын 130-тан тахса эбийиэгин үлэҕэ киллэрдибит. Олохтоохтор дьиэлэриттэн барбакка эрэ миэстэтигэр тустаах көмөнү ылалларын туһугар доруобуйаны харыстабылын миэстэтигэр сайыннарыы үлэтин салҕыыбыт. Саҥа амбулаториялары тутарга кыттыбыт дьоҥҥо барыларыгар махтанабын. Ураты махталбын быраастарга,  мэдиссиинэ кэлэктиибин хас биирдии үлэһитигэр күннээҕи сыралаах үлэлэрин, идэлэригэр үрдүк таһымнарын уонна эмтэнээччилэргэ кыһамньыларын иһин этэбин. Олохтоохтору саҥа балыыһалар аһыллыыларынан эҕэрдэлиибин. Оттон эмчиттэргэ саҥа усулуобуйаҕа ситиһиилээх үлэни баҕарабыт. Бу амбулаториялар өр сылларга дьоҥҥо-сэргэ туһалаатыннар!”, —— диэн Ил Дархан Айсен Николаев бэйэтин ханаалыгар суруйда.

Мэдиссиинэ бу эбийиэктэрин тутарга уонна толору сэбилииргэ РФ бэрэсидьиэнэ Владимир Путин көҕүлүүр “Уһун уонна көхтөөх олох” национальнай бырайыагын чэрчитинэн,  91,8 мөлүйүөн солкуобай бэриллибитэ.