ЭСПИЭР СҮБЭТЭ: Микрозаймтан босхолонобут…

Микрозайм (түргэн харчы) уонна кирэдьиит баар буолан, уонунан тыһыынча дьон төлөммөт улахан иэскэ киирэллэр. Кирэдьиит устуоруйаларын алдьатымаары, сорохтор саҥаттан саҥа үрдүк бырыһыаннаах иэскэ-күүскэ киирэллэр. Ол түмүгэр кыра иэс биллэр-биллибэттик улаатан, «хам ыга тутар моойтурукка» кубулуйар.

Үп-харчы эспиэрдэрэ моҥкуруукка тиийиэх иннинэ, иэстэн хайдах босхолонор туһунан чопчу былааны оҥордулар.

1 хардыы. Саҥа иэскэ кииримэҥ.Үп-харчы исписэлиистэрэ этэллэринэн, иэскэ ыктарбыт киһи бастакынан саҥа микрозаймнары уонна кирэдьиит каарталарын ылыыттан кытаанахтык аккаастаныахтаах. Иэс харчы ылан, эргэ иэһи сабарга түһүмэҥ.

2 хардыы. Бүддьүөтү суоттааһын. Кирэдьиит эспиэрэ Татьяна Волкова этэринэн, кирэдьииттээх киһи  бүддьүөтүн толору үөрэтиэхтээх: баар иэстэри, бырыһыаннарын, төлүүр кыраапыктарын уонна сүрүн ороскуоттары барытын кумааҕыга сурунан ылыахтаах. Суолтата суох ороскуоттары аччатарга сүбэлииллэр: тугу эрэ эмискэ атыылаһыаххын баҕардаххына, ол санааҕын сарсыҥҥыга көһөр — үксүгэр биир хонугунан ол малы атыылаһар санаа уостан хаалар.

3 хардыы. Кыра да сууманы төлөөҥ. «Эбии кыра да сууманы уга сырыттахха, улахан иэс харчы суумата көҕүрүүр. Холобур, 1 мөл. солк. кирэдьиити 15% сыллааҕы бырыһыаннаах 5 сылга ылбыт буоллаххына, ый аайы эбии 5 тыһыынча солкуобайы угааһын  иэһи 1 сыл 2 ый эрдэ сабарга уонна бырыһыаныгар 111 тыһыынча солкуобайы хырыыстыырга көмөлөһөр», — диэн суоттаан көрдөрөр Татьяна Волкова.

4 хардыы. Реструктуризация эбэтэр кирэдьиит сынньалаҥа. Бааҥҥа просрочка тахсыан иннинэ хайаатар да тиийиҥ. Баан кирэдьиит болдьоҕун уһатан, ыйга төлөнөр сууманы кыччатар кыахтаах. Оттон кирэдьиит сынньалаҥын туһунан эттэххэ, сокуонунан чэпчэтии киһи дохуота 30%-тан тахса түстэҕинэ бэриллэр. Төлөбүр 6 ыйга диэри тохтотуллар, ол эрээри бырыһыана ааҕыллан иһэрин умнумаҥ.

Хайаан да моҥкуруут буолар наада дуо? Өскөтүн дохуотуҥ олус кыччаан, тугу да төлүүр кыаҕыҥ суох буоллаҕына, бүтэһик быһаарыы — моҥкуруут буолар процедураны ааһыы буолар. Маннык быһаарыыны ылыныах иннинэ, үөһэ этиллибит түөрт хардыыны оҥоро сатааҥ.