Федор Охлопков кэриэһигэр турнир ыалдьыттара кэлэллэр

Бүгүн Саха сиригэр «ВОИН» киин дириэктэрэ Дмитрий Шевченко, ону таһынан Бурятия уонна Чукотка бэрэстэбиитэллэрэ кэллилэр. Хамаандалар салгыы түмсэллэр – Уһук Илин эрэгийиэнин уонна доҕордуу дойдулартан ыалдьыттар өрөспүүбүлүкэ киин куоратыгар мусталлар.

Дьокуускайга «Сулус» полигоҥҥа Сэбиэскэй Сойуус Дьоруойа Федор Охлопков кэриэһигэр ырааҕы чопчу ытыыга турнир быйылгыттан аан дойдутааҕы таһымнаах буолла. 200-тэн тахса кыттааччы регистрацияламмыта, ол иһигэр 120 снайпер паарата. Аан бастаан 16-18 саастаах юниордар ортолоругар туспа күрэхтэһиилэр ыытыллыахтара. Кылаабынай судьуйанан Уһук Илин федеральнай уокурук боломуочуйалаах бэрэстэбиитэлэ – вице-премьер Юрий Трутнев буолар.

Кыра калибрдаах бинтиэпкэттэн ытыыга юниордар ортолоругар дьоҕус турнирга Уһук Илин бары эрэгийиэннэриттэн 11 хамаанда кыттар.

Турнир тэрийээччилэрэ – Уһук Илин федеральнай уокурук боломуочуйалаах бэрэстэбиитэлин аппараата, Саха сирин бырабыыталыстыбата, Арассыыйа бойобуой снайперинг федерацията, «ВОИН» киин уонна Арассыыйа бойобуой ускуустубаларын сойууһа.

Турнир алтынньы 8-11 күннэригэр «Сулус» полигоҥҥа ыытыллыаҕа.