Федор Охлопков кэриэһигэр ыытыллар снайпинг турнирыгар икки сүүстэн тахса сайаапка киирдэ

Сэбиэскэй Сойуус Дьоруойа Федор Матвеевич Охлопков кэриэһигэр ыытыллар ырааҕы ытыыга IV турнирга кыттарга сайаапкалары араас эрэгийиэннэртэн икки сүүстэн тахса кыттааччы биэрбит. Күрэхтэһии алтынньы 8-11 күннэригэр Дьокуускайга ыытыллар.

Турнирга бэлэмнэнии боппуруостарын СӨ Ил Дархана Айсен Николаев ыыппыт тэрийэр кэмитиэтин мунньаҕар көрдүлэр.

—Кыттааччылар географиялара кэҥээн иһиитэ ыраахтан бэргэнник ытыыны сэҥээрэллэрин уонна биһиги турнирбытын сэргииллэрэ улаатарын туоһулуур. Биһиги сорукпут — турниры үрдүк таһымҥа ыытыы, кыттааччыларга, ыалдьыттарга бары сөптөөх усулуобуйаны тэрийии, — диэн Айсен Николаев бэлиэтээтэ.

Күрэхтэһии техническэй параметрдарынан дойду биир бастыҥ полигона «Сулус»  үөрэтэр-ытар киинин баазатыгар ыытыллар. Сыл аайы турнир байыаннай сулууспалаахтары, ыраахтан ытыыга идэтийбит спортсменнары, уо.д.а. түмэр.

Турнир бырагырааматыгар күнүскү уонна түүҥҥү ытыылар киирэллэр. Кыттааччыларга өссө эбии тургутуулар бааллар, ол курдук араас усулуобуйаҕа сыалы чопчу ытыылларын, тулуурдарын, үөрүйэхтэрин көрдөрүөхтээхтэр.

Быйыл аан бастаан турнир чэрчитинэн 16-18 саастаах ыччаттарга күрэхтэһии ыытыллыаҕа. Сайаапкалар Уһук Илин 11 эрэгийиэниттэн 33 кыттааччыттан киирдилэр. Бу хайысха ыччаты байыаннай-прикладной успуорт көрүҥнэригэр тардар уонна эдэрдэри ыраахтан ытыы үөрүйэҕин билиһиннэрэр.

—Быйыл аан бастаан 16-18 саастаах ыччаттарга дьоҕус турнир ыытыллыаҕа. Бу ыччаты патриотическай иитиигэ үлэ улахан суолталаах чааһа буолуо диэн эрэнэбин, диир Ил Дархан.

Күрэхтэһиини тэрийээччилэринэн РФ Бэрэсидьиэнин Уһук Илин ФУо  боломуочуйалаах бэрэстэбиитэлин аппараата, Арассыыйа бойобуой снайпиҥҥэ федерацията, «ВОИН» ыччаты байыаннай-спортивнай бэлэмнээһин уонна патриотическай иитии киинэ уонна СӨ Бырабыыталыстыбата буолаллар.

Мунньах түмүгүнэн Айсен Николаев эппиэттээх биэдэмистибэлэргэ уонна тэрийээччилэргэ турниры бэлэмнээһиҥҥэ уонна ыытыыга сыһыаннаах бары боппуруостары сиһилии ырытан көрөллөрүгэр сорудахтаата. Ил Дархан былаһаакка бэлэм буолуутугар, кыттааччылары ханна түһэрэллэригэр уонна тырааныспарынан таһыыга, куттал суох буолуутун хааччыйыыга, мэдиссиинэ көмөтүнэн хааччыйыыга уонна күрэхтэһии бырагырааматын тэрийии боппуруостарыгар ураты болҕомтону уурарга соруйда. Санатан эттэххэ, Сэбиэскэй Сойуус Дьоруойа Федор Охлопков кэриэһигэр ыраах дистанцияларга ытыыга бүтүн Арассыыйатааҕы турнир Саха сиригэр 2024 сылтан ыытыллар. Былырыын Арассыыйа араас эрэгийиэннэриттэн 130-тан тахса күрэхтэһээччи түмсүбүтэ.

Турнир Сэбиэскэй Сойуус Дьоруойа, аатырбыт саха снайпера Федор Матвеевич Охлопков кэриэһигэр ананар. Күрэхтэһии РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев өйөбүлүнэн ыытыллар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Сиһилии: https://www.sakha.gov.ru/news/61955

Хаартыскаҕа Андрей Сорокин түһэриитэ, ЯСИА