«Ген Арктики. Якутия» киинэ сүрэхтэннэ

Атырдьах ыйын 27 күнүгэр, Арассыыйа киинэтин күнүгэр Дьокуускай куоракка “Лена” киинэ тыйаатырыгар “Ген Арктики. Якутия” документальнай киинэни көрдөрдүлэр.

Документальнай киинэ Хотугу сир төрүт норуоттарын күннээҕи олохторун, кинилэр үгэстэрин, олоҕу көрүүлэрин, айылҕаҕа сыһыаннарын  көрдөрөр.

Бу киинэни устар санаа өссө 2024 сыллаахха киирбитэ.  Киинэни устааччылар бырайыактарын “Мастерская новых медиа” уонна “Институт развития интернета” (ИРИ) кэмиэрчэскэйэ суох тэрилтэ өйөөбүттэрэ. Санатан эттэххэ,  бырайыак медиабырайыактарга Бүтүн Арассыыйатааҕы куонкурус кыайыылааҕынан тахсыбыта.

Документальнай киинэни быйыл саас Саха сиригэр устан саҕалаабыттара.  Киинэни устарга Саха сирин хамаандата араас эрэгийиэн исписэлиистэрин кытары үлэлээтилэр.

“Биһиги бу бырайыакпытын саҕалыырбытыгар  Арктиканы манна олорор дьон күннээҕи түбүктэрин нөҥүө көрдөрөрбүт ордук суолталааҕын өйдөөбүппүт. Ол иһин, киинэбит дьоруойдарын кытары кинилэр көс сирдэригэр барбыппыт уонна кинилэр олохторун ис-иһиттэн билэргэ кыһаллыбыппыт”, — диэн киинэ продюсера Антон Васильев иһитиннэрдэ.

Онон киинэ сүрүн дьоруойдарынан табаһыттар, Томпо улууһун Тополинай сэлиэнньэтин эбээннэрэ буолбуттар. Киинэ табаны иитии  уонна онуоха үгэс буолбут билии, үөрүйэх  Арктика олоҕун быстыбат сорҕото буоларын итэҕэтэр. «Ген Арктики. Якутия» документальнай киинэ Арктиканы стратегическай суолталаах сир-уот быһыытынан көрдөрөр.

Киинэни  “ВКонтакте” босхо көрүөххэ сөп.