Горнай 200 саастаах маһа Бүтүн Арассыыйатааҕы куонкуруска кыттар

Горнай Бэрдьигэстээҕэр үүнэр ураты мас — Каяндер тиитэ «Деревья — памятники живой природы» диэн Бүтүн Арассыыйатааҕы куонкуруска кыттар. Бу туһунан эрэгийиэн экологияҕа министиэристибэтэ иһитиннэрэр.

Бу мас 200-тэн тахса саастаах. Номох буолбут Маатта эмээхсини кытта сибээстээх. Бу тиит анныгар кини киэһэ аайы ынахтарын көрсөрө үһү. Айанньыттар эмээхсин дьиэтигэр суох буоллаҕына, бу тиит анныгар олорорун бары бэркэ билэллэрэ. Тиит аннынан Маатта үрэх устар. Манна сайыҥҥы куйаастан уонна ардахтан ынахтар, сылгылар хаххаланаллар.

Ураты маспыт бастыҥнар кэккэлэригэр киирэрин туһуттан  www.rosdrevo.ru саайка киирэн, 64-с нүөмэргэ куоластыахха сөп. Куонкурус бу сыл ыам ыйын 1 күнүттэн атырдьах ыйын 1 күнүгэр диэри ыытыллар.