Горнай улууһугар байыаннай эстэпиэтэҕэ 10 хамаанда күөн көрүстэ

Бу күннэргэ Горнай улууһун Күөрэлээх сэлиэнньэтигэр байыаннай дьайыы кыттыылаахтарын Е. Татаринов, Р. Яковлев, Я. Жирков уонна А. Попов ааттарын үйэтитэр аналлаах байыаннай эстэпиэтэҕэ 10 хамаанда бэйэлэрин тургутан көрдүлэр.

Ардаҕы уонна күүстээх тыалы аахсыбакка хамаандалар көхтөөхтүк кытыннылар. Кинилэр бэйэлэрин дьоҕурдарын биэс дисциплинаҕа: тактическай уонна байыаннай бэлэмнэниигэ, аптамааты ыһыыга уонна хомуйууга, гранаатаны быраҕыыга уонна тактическай мэдиссиинэҕэ күрэхтэстилэр.

Онтон «ВОИН» инструктордара хас биирдии түһүмэҕи чопчутук уонна сөптөөхтүк сыаналаатылар уонна кыттааччылар куттала суох буолууларын хааччыйдылар. Кинилэр, бэйэлэрэ байыаннай дьайыыны ааспыт дьон, эстэпиэтэ үрдүк тэрээһиннээхтик ааһарыгар көмөлөстүлэр.

Онон байыаннай эстэпиэтэ түмүгүнэн кыайылаахтар маннык быһаарылыннылар:

• 1 миэстэ – Дьокуускайдааҕы педагогическай кэллиэс бастакы хамаандата;
• 2 миэстэ – ХИФУ Физическэй култуура уонна успуорт институтун хамаандата;
• 3 миэстэ – Дьокуускайдааҕы педагогическай кэллиэс иккис хамаандата.

«ВОИН» киин Саха сиринээҕи салаатын бэрэстэбиитэллэрэ кыайыылаахтары эҕэрдэлээтилэр уонна үгэс курдук, үрдүккэ талаһарга уонна биир саастыылаахтарыгар холобур буолалларыгар баҕардылар.

«Горнай улууһун уонна Октябрьскай нэһилиэгин дьаһалталарыгар, ону тэҥэ байыаннай эстэпиэтэ тэрийээччилэригэр көхтөөх уонна таһаарыылаах бииргэ үлэлэрин иһин махтанабыт. Биһиги Саха сирин эдэр ыччатын патриотическай иитиигэ бииргэ оҥорор үлэбитин үрдүктүк сыаналыыбыт», — диэн «ВОИН» киин салалтата махталын биллэрдэ.