Горнай улууһун үс нэһилиэгэ — кэтэбилгэ

Бүгүҥҥү күҥҥэ Горнай улууһун үс  нэһилиэгэр уу таһыма кутталлаах кирбиини куоһаран, ыксаллаах быһыы эрэсиимэ олохтонно.

Бу туһунан улуус баһылыгын бастакы солбуйааччы Алгыс Стручков маннык иһитиннэрдэ:

— Солоҕоҥҥо, Одунуга, Бэс Күөлүгэр кыра үрэхтэр таһымнарыттан тахсан, ыксаллаах быһыы эрэсиимин олохтообуппут.

Урукку сылларга хаар уута 2-3 күн тахсан баран, түһээччи.  Күөрэлээх уонна Бэс Күөлүн икки ардыгар турар Ампаардаах сайылык  Киэҥ үрэҕэ  өрөспүүбүлүкэтээҕи Кэбээйилиир суолу быста. 

Билигин нэһилиэнньэлээх пууннары кэтээн көрөбүт. Дьиэлэрин уу ылыан сөптөөх түөлбэлэртэн дьону көһөрө сылдьабыт.