Госдуума уматык ырыынагын туруктаах оҥорор сокуону ылынна

Судаарыстыбаннай Дуума үһүс ааҕыыга уматык ырыынагын туруктаах оҥорорго туһуламмыт РФ Нолуокка кодексатыгар уларытыылары киллэрэр сокуону ылынна.

Дойду иһигэр дизель уматыгын сыаната үрдүүрүн тохтотор сыалтан, импортнай «демпфер» диэн мэхэньиисими киллэрдилэр. Бу тугуй диэтэххэ, тэрилтэлэр тас дойдуттан уматыгы киллэрэн, дойду иһигэр тас  ырыынактан чэпчэки сыанаҕа атыылыыр буоллахтарына, судаарыстыба бүддьүөттэн толуйууну төлүөхтээх. «Российская газета» суруйарынан, маннык ньыма бэнсииҥҥэ номнуо үлэлиир.

Энергетика министиэристибэтин быһаарыытынан, дьаһал тас дойдуттан дизель уматыгын аҕалыыны көҕүлүөҕэ.

«Наада буоллаҕына, тас дойдуттан эбии уматыгы түргэнник аҕаларга, тэрилтэлэргэ барыстаах усулуобуйаны олохтуурга уонна Арассыыйа олохтоохторун уматыгынан бигэтик хааччыйарга көмөлөһүөҕэ», — диэн энергетика миниистирэ Сергей Цивилев иһитиннэрдэ.

Оттон Госдуума бэрэссэдээтэлэ Вячеслав Володин бэлиэтииринэн, докумуон дойдуну уматыгынан хааччыйарга улахан суолталаах. «Уматык фроҥҥа да, тыылга да, хомуур хампаанньатын саҕана уонна суһал сулууспаларга баар буолуохтаах», — диэн кини эттэ. Ону таһынан, саҥа сокуон олохтоохтору уонна тэрилтэлэри уматыгынан хааччыйыыга сытыытык турар боппуруостары быһаарарга көмөлөһүөҕүн бэлиэтээтэ.

Сокуон Арассыыйа Бырабыыталыстыбатын боломуочуйатын кэҥэтэр. Итиэннэ сотору кэминэн балаһыанньа тупсуоҕа диэн күүтэллэр:

— Сарсын-өйүүн сыанаҕа да, уматыгынан хааччыйыыга да балаһыанньа тосту уларыйыаҕа. Инникитин биһиэхэ охсууну оҥорботторун уонна ити эйгэҕэ кыһалҕаны үөскэппэттэрин туһугар саппааһы оҥостобут. Бу олус суолталаах быһаарыы, — диэн Вячеслав Володин түмүктээтэ.