«Госуслуги» нөҥүө орто анал үөрэххэ киирэргэ 46 тыһ. кэриҥэ сайаапка киирдэ

Саха сиригэр кэллиэстэргэ уонна тиэхиньикумнарга үөрэххэ киирээччилэри ылыы салҕанар. Бүгүҥҥү туругунан, өрөспүүбүлүкэ олохтоохторо «Госуслуги» портал нөҥүө орто анал үөрэх тэрилтэлэригэр киирэргэ 45 953 сайаапканы биэрдилэр.

Арассыыйа үрдүнэн кэллиэстэргэ уонна тиэхиньикумнарга «Госуслуги» нөҥүө биэриллибит сайаапка ахсаана 2 мөлүйүөнү куоһарда. Бу ааспыт сыл маныаха маарынныыр кэминээҕэр үс гыммыт бииринэн элбэх. Портал көмөтүнэн абитуриеннар үөрэх тэрилтэтин уонна идэни талыахтарын, ону тэҥэ наадалаах докумуоннарын ыраахтан олорон ыытыахтарын сөп. Үөрэххэ киирээччилэргэ «Госуслуги» порталга 4 тыһыынчаттан тахса кэллиэс уонна тиэхиньикум, 357 идэ уонна 170-тан тахса тустаах  үөрэх бырагыраамата баар.

«Саха сирин олохтоохторуттан 46 тыһыынча кэриҥэ сайаапка киирбитэ — сыыппара сервистэрэ дьоҥҥо олус наадалаахтарын көрдөрөр. Бүгүн абитуриент айаҥҥа уонна приёмнай хамыыһыйаларга барарга бириэмэтин бараабакка, докумуоннарын онлайн ыытыан сөп. Биһиги өрөспүүбүлүкэбитигэр аныгы сыыппара кыахтара ханна олороруттан тутулуга суох хас биирдии киһиэхэ тиийимтиэ буолаллара ураты суолталаах. Маннык сервистэр сайдыылара Саха сирин олохтоохторугар судаарыстыбаннай өҥөлөрү ылары чэпчэтэр уонна табыгастаах оҥорор», — диэн Саха Өрөспүүбүлүкэтин Инновацияларга, сыыппара сайдыытыгар уонна инфокоммуникационнай технологияларга миниистирэ Петр Николаев бэлиэтээтэ.

Докумуону хомуйар хампаанньа биир туспа хайысхатынан тустаах  үөрэххэ ылыы буолар. Маннык көрүҥ абитуриеҥҥа үлэни биэрээччини эрдэттэн таларыгар уонна үөрэҕин бүтэрдэҕинэ хайаан да үлэнэн хааччылларыгар кыах биэрэр. Быйыл «Госуслуги» портал нөҥүө дойду үрдүнэн тустаах үөрэххэ номнуо 70 тыһыынча кэриҥэ сайаапка киирдэ.

Кэллиэстэргэ уонна тиэхиньикумнарга бүддьүөт миэстэлэригэр сайаапканы тутуу атырдьах ыйын 15 күнүгэр диэри салҕанар. Докумуоннары «Госуслуги» порталга кэллиэскэ киирии сервиһин нөҥүө ыраахтан олорон биэриэххэ сөп.