Хабаровскай быыһааччылара Саха сиригэр көмөҕө кэллилэр

Хабаровскайтан Бе-200 сөмөлүөт 20 быыһааччыны аҕалла. Кинилэр Хабаровскай көрдүүр-быыһыыр этэрээттэриттэн кэллилэр. Сөмөлүөкка нэһилиэнньэҕэ көмөҕө аналлаах тэриллэр уонна снаряжениелар бааллар. Кэлбит быыһааччылары Нам улууһугар — Хатырыкка уонна Граф Биэрэгэр үллэрдилэр.

«Быыһааччылар олохтоох былаастары кытта бииргэ сааскы халаан уутун куттала суох аһарыыны хааччыйыахтара уонна балаһыанньа мөлтөөтөҕүнэ, аадырыстаах көмөнү оҥоруохтара», — диэн Арассыыйа ЫБММ-ын Саха сиринээҕи сүрүн управлениетын начаалынньыга Павел Гарин иһитиннэрдэ.

ЫБММ суһал бөлөхтөрө бүгүн Таатта, Ленскэй, Өлүөхүмэ уонна Алдан оройуоннарыгар үлэлииллэр. Витим уонна Пеледуй бөһүөлэктэригэр, уу тахсыбытын кэннэ эвакуация ыытыллыбыта, балаһыанньа бигэтийдэ, ол гынан баран бөлөхтөр хонтуруоллууллар.