Хайысханан үөрэтии түмүктээҕэ көһүннэ

Ил Дархан үөрэх үлэһиттэрин сүбэ мунньаҕар үөрэх хаачыстыбатын туһунан тиһигин быспакка этэр. Быйыл биир кэлим эксээмэн түмүгэ өссө тупсубутун бэлиэтээтэ.

“Быйыл биир кэлим эксээмэн түмүгүнэн 30 бүтэрээччи 9 биридимиэккэ 100 баалы ылбыта үөрдэр. Урут 100 баалы биэс-сэттэ биридимиэккэ ылаллара. Ону тэҥэ, ааспыт 2025 сылы кытта тэҥнээтэххэ, тоҕус биридимиэккэ орто баал көрдөрүүтэ үрдээбит”, – диэн эттэ.

Оскуоланы бүтэрээччилэртэн элбэх оҕо уопсай сууматынан 180-тан тахса баалы ылбыт. Мииринэй, Нерюнгри, Эдьигээн, Ленскэй улуустарыгар, Жатайга уонна Дьокуускайга бүтэрээччи 70-тан тахса бырыһыана талар биридимиэти туттарбыт.

“Болҕомтону эрэйэр кыһалҕалар бааллар. Холобур, хайысхаларынан биридимиэти таларга көрдөрүүнү ситиһэри сыаналааһын кырдьыктаах буолуута, ыраах нэһилиэктэр уонна кыра кэмпилиэктээх оскуолалар бүтэрээччилэрэ күөн күрэстэһэр кыахтаныылара. Манна булгуччу күүскэ ылсан үлэлиирбит ирдэнэр. Уопсайынан, үөрэнээччилэр естественнэй-научнай, технологическай, инновационнай хайысхаҕа интэриэстэрэ үрдээн иһэрэ көстөр. Үксүгэр бу, өрөспүүбүлүкэҕэ күүскэ киирэн эрэр хайысхаларынан үөрэхтээһин түмүгэ буолар. Былырыын номнуо Саха сирин үрдүкү кылааһын 90-тан тахса бырыһыана хайысхаларынан үөрэтэр кылааска үөрэммитэ. Кинилэр түмүктэрэ биһиги сөптөөх хайысханан баран иһэрбитин туоһулуур” – диэн Ил Дархан бэлиэтээтэ.