Хаҥалас улууһугар сокуоннай сааһын ситэ илик оҕону халаабыттарын иһин холуобунай дьыала тэрилиннэ

РФ Саха сиринээҕи Силиэстийэлиир управлениетын Киин улуустар икки ардыларынааҕы силиэстийэлиир отделыгар РФ Холуобунай кодексатын 162-с ыстатыйатын 2-с чааһынан (бөлөхтөөн халааһын, саба түһүү) холуобунай дьыала тэрилиннэ.

Силиэстийэ чахчытынан, бу дьыл балаҕан ыйын 25 күнүгэр 22:00 чаастан 23:00 чааска диэри Хаҥалас улууһун Ой сэлиэнньэтигэр маҕаһыын таһыгар 2006 с.т. икки эдэр киһи арыгылаан баран, бэйэлэрин интэриэстэрин туһугар болдьоһон, урут билбэт сокуоннай сааһын ситэ илик уолларыгар саба түспүттэр.

Саба түһэр кэмнэригэр уорбаланааччылар сокуоннай сааһын ситэ илик оҕону илиилэринэн-атахтарынан сирэйигэр уонна илиитигэр-атаҕыгар 5-тэн итэҕэһэ суох төгүл охсубуттар. Ол кэнниттэн малын-салын биэрэригэр модьуйан, 8 тыһыынча солкуобайтан тахса суумалаах малын аһаҕастык былдьаабыттар.

Маны таһынан, биир саба түһээччи оҕону быһаҕынан куттаан, бу түбэлтэ туһунан кимиэхэ эмэ кэпсиир буоллаххына өлөрүөм диэн суоһаабыт. Уорбут малларын-салларын ылан, хара санаалаахтар түбэлтэ буолбут сириттэн куоппуттар.

Полиция үлэһиттэрэ көрдүүр дьаһалларын түмүгэр уорбаланааччылар кимнээхтэрин быһаардылар. Кинилэр бу сэлиэнньэҕэ ыалдьыттыы кэлбит устудьуон уонна үлэтэ суох сылдьар дьон буолаллара биллибит. Силиэдэбэтэл көрдөһүүтүнэн, суут кинилэри хаайыыга ыытта. Билигин холуобунай дьыалаҕа быһылаан төрүөтүн быһаарарга силиэстийэлиир дьайыылар ыытыллаллар.