Хаҥалас улууһугар сүппүт 65 саастаах дьахтары көрдөөһүн салҕанар

Атырдьах ыйын 12 күнүгэр Хаҥалас улууһун Еланка сэлиэнньэтигэр отоннуу сылдьан олохтоох дьахтар сүппүт. Миэстэтигэр СӨ Быыһыыр сулууспата тахсан, анал тиэхиньикэни уонна пилота суох көтөр аппарааты туһанан көрдүүр үлэни ыытар.

Нэһилиэк баһылыгын солбуйааччы барыллаан иһитиннэриитинэн, атырдьах ыйын 12 күнүгэр 1960 сыллаахха төрөөбүт дьахтар сарсыарда 8 чааска тыаҕа сир астыы барбыт. Күнүс төлөпүөнүнэн сибээскэ тахса сылдьыбыт, ити кэнниттэн төлөпүөнэ арахсан хаалбыт. Күн бүгүҥҥэ диэри кини ханна баарын туһунан туох даҕаны биллибэт. Биир дойдулаахтара уонна полиция үлэһиттэрэ тута көрдөөһүнү саҕалаабыттар.

Бэҕэһээ, атырдьах ыйын 13 күнүгэр, Дьокуускайтан Станислав Захаров салайааччылаах быыһыыр сулууспа биэс быыһааччыта тахсыбыт. Уустук сирдэри чинчийэргэ анал тиэхиньикэ туһаныллар – “Соболь” массыына уонна квадроцикл.

Халлаан хараҥарыар диэри көрдөөччүлэр Хомустаах диэн сиргэ сайыҥҥы мэччирэҥи кэрийбиттэр. Дьахтар бүтэһигин сибээскэ онтон тахыбыт эбит. Тустаах сири чинчийии туох даҕаны түмүгү аҕалбатах. Борук-сорук буолуута быыһааччылар тепловизорынан хааччыллыбыт квадрокоптеры көтүппүттэр. Көрдүүр үлэ салҕанар. Бу туһунан Саха сиринээҕи быыһыыр сулууспа МАХ-ханаалыгар суруйаллар.