Хаҥалас улууһун Өктөмүгэр эр киһи кэргэнин кырбаан өлөрбүт

Хаҥалас улууһун Өктөм сэлиэнньэтигэр 58 саастаах дьахтар өлүгэ көһүннэ. Кинини өлөрүүгэ уорбаланан кэргэнэ тутулунна диэн, Саха сиринээҕи Силиэстийэлиир кэмитиэтэ иһитиннэрэр.

Силиэстийэ барылынан, кэргэнниилэр Ярославскай уулуссатыгар баар кыбартыыраҕа итирдэр утаҕы испиттэр. Икки ардыларыгар этиһии тахсан, эр киһи кэргэнин иһигэр, төбөтүгэр уонна этигэр-сиинигэр хаста даҕаны күүскэ охсубут. Дьахтар ылбыт эчэйиилэриттэн тута тыына быстыбыт.

Кэлин биллибитинэн, уорбаланааччы ити иннинэ эмиэ кэргэнигэр илиитин көтөҕөр эбит — эр киһини дьахтары кырбаабытынан урут иккитэ сууттаабыттар, ол эрээри эр киһи онтон түмүк оҥостубатах. Суут кинини хаайарга уураахтаата. Билигин силиэдэбэтэллэр быһылаан төрүөттэрин быһаараллар уонна дакаастабыллары хомуйар үлэни ыыталлар.