Хатас аннынан үрэххэ эдэр киһи өлүгэ көһүннэ

Водолазтар Хатас сэлиэнньэтин анныгар Өлүөнэ өрүс салаатыгар 2004 с.т. эр киһи өлүгүн буллулар.

Барыллаан дааннайдарынан, эдэр киһи бэнидиэнньиккэ, от ыйын 13 күнүгэр, ууга түспүт. Бу туһунан от ыйын 16 күнүгэр Саха сиринээҕи Быыһыыр сулууспатыгар иһитиннэрдилэр.

Быһылаан олохтоох дьон сөбүлээн сылдьар, ууга киирэргэ көҥүллэммэт пляжка буолбут. Аймахтарын тылынан, уол соччо билбэт дьонун кытта сынньаммыт. Кини чуолкай хаһан ууга тимирбитин ким да билбэт. Бииргэ сылдьыбыт дьоно киһи сүппүтүн туһунан биллэрбэккэ эрэ дьиэлэригэр тарҕаспыттар.

Өлбүт киһи дьиэтигэр төннүбэтэҕэр, бииргэ олорор дьахтара долгуйан көрдөөн саҕалаабыт. Дьахтар кытылга кэлэн, кини таҥаһын уонна малын булан баран, тута көмө көрдөөбүт.

От ыйын 16 күнүн сарсыардатыгар Саха сиринээҕи Быыһыыр сулууспатын түөрт водолаһа көрдөөһүнү саҕалаабыттар. Өрүс уутун көрөр гидролокатор көмөтүнэн чинчийбиттэр, бу көрдүүр сири чуолкайдыырга көмөлөспүт.

«Үрэххэ дириҥ дьаамалар элбэхтэр», — диэн көрдүүр бөлөххө кэпсээтилэр. Сүппүт киһи өлүгэ кытылтан чугас, биэс миэтэрэ дириҥҥэ булулунна.

Быыһааччылар олохтоохтору көҥүллэммэт сирдэргэ, ордук арыгы испит туруктаах, сөтүөлээбэттэригэр ыҥыраллар.