ХИФУ: 8 тыһыынча кэриҥэ сайабылыанньа орто үөрэх бырагыраамаларыгар бэрилиннэ

2026-2027 үөрэх дьылыгар ХИФУ орто идэлээх үөрэх бырагыраамаларыгар  абитуриеннары 355 бүддьүөт уонна 485 төлөбүрдээх миэстэлэргэ ылар. Билиҥҥитэ 2 тыһыынча кэриҥэ абитуриент докумуонун туттаран, кинилэртэн 8 тыһыынча кэриҥэ сайабылыанньа ылылынна.

ХИФУ үөрэххэ ылар киин хамыыһыйата иһитиннэрбитинэн,  Хотугулуу-Илиҥҥи федеральнай университекка  орто идэлээх үөрэх бырагыраамаларыгар докумуоннары тутуу бэс ыйын 20 күнүттэн саҕаламмыта. Инфраструктурнай технология кэллиэһигэр, инженернай-тиэхиниичэскэй институкка, устуоруйа уонна юридическай факультеттарга  докумуоннары атырдьах ыйын 15 күнүгэр диэри ылаллар. Мэдиссиинэ институтугар докумуоннары ылыы атырдьах ыйын 10 күнүгэр түмүктэнэр.