ХИФУ уопсайыгар маҥнайгы куурус устудьуона өлүүтүгэр тиэрдибит дьыаланы көрдүлэр

Саха Өрөспүүбүлүкэтин Үрдүкү Суута апелляция бэрээдэгинэн Бүлүү улууһуттан төрүттээх 19 саастаах уолга тэриллибит холуобунай дьыаланы көрдө (РФ Холуобунай кодексатын 111 ыст. 4 ч. — киһи доруобуйатыгар соруйан ыарахан эчэйиини таһааран, сэрэҕэ суох быһыыттан өлүүгэ тиэрдии).

Присяжнайдар  коллегията хара санаалааҕы буруйдааҕынан билиннэ: кини былырыын сэтинньи 1 күнүн түүнүгэр М.К. Аммосов аатынан ХИФУ уопсайын хоһугар итирик туруктаах сылдьан, тус бэйэтэ сөбүлээбэтиттэн  эмсэҕэлээбит уолу кырбаабыт.

Ылбыт эт-хаан эчэйиилэрин түмүгэр эмсэҕэлээбит маҥнайгы куурус устудьуона Саха сиринээҕи 2-с №-дээх Өрөспүүбүлүкэтээҕи балыыһаҕа тыына быстыбыт.

Дьокуускай куорат суутун  бу дьыл атырдьах ыйын 21 күнүнээҕи бириигэбэринэн, присяжнайдар коллегияларын буруйдуур быһаарыыларыгар олоҕуран, эдэр киһи РФ ХК 111 ыст. 4 ч. көрүллэр буруйу оҥорбутугар буруйдааҕынан ааҕылынна уонна кытаанах эрэсиимнээх көннөрөр холуонньаҕа 8 сылга көҥүлэ быһылларга уураахтанна.

Ону тэҥэ суут эмсэҕэлээччилэргэ 128 500 солкуобай материальнай хоромньуну уонна 5 000 000 солкуобай моральнай хоромньуну төлөттөрөргө быһаарда.

Бириигэбэри сууттаммыт киһи албакаакка үҥсүбүт. Кини суут силиэстийэтигэр РФ Холуобунай-процессуальнай кодексатын кэһиллиилэрэ элбэхтик тахсыбыттарын туруорсубут уонна моральнай хоромньу сууматын кытта сөбүлэспэтэх. Бириигэбэри көтүрүүгэ уонна дьыаланы саҥаттан көрүүгэ ыытарга көрдөспүт.

Саха Өрөспүүбүлүкэтин Үрдүкү Суутун холуобунай дьыалаларга апелляция инстанциятын суута, коллегиальнай састаабынан дьыала матырыйаалларын көрөн уонна өрүттэр этиилэрин истэн баран, маҥнайгы инстанция суутун бириигэбэригэр буруйданааччы дьиэтигэр хаайыыга олорбут кэмин ааҕан  уларытыы киллэрдэ. Ол эрээри анаммыт бириигэбэр уларытыллыбатах. Бириигэбэр сокуоннай күүһүгэр киирдэ диэн  Саха Өрөспүүбүлүкэтин сууттарын холбоһуктаах пресс-сулууспата иһитиннэрэр.