Хомусчут Айсен Аммосов Сингапурга Гран-при үрдүкү наҕараадатын ылла

Саха сирин талааннаах хомусчута, виртуоз-толорооччу Айсен Аммосов Сингапурга буолан ааспыт Норуоттар икки ардыларынааҕы муусука уонна ускуустуба бэстибээлигэр (Singapore International Music & Arts Festival 2026) үрдүкү наҕарааданы — Гран-прини тутта. Бу үөрүүлээх сонуну кини бэйэтин социальнай ситимнэригэр иһитиннэрдэ.

SIMAF-2026 бэстибээл аан дойду араас муннуктарыттан эдэр, чаҕылхай талааннаах артыыстары уонна муусукааннары биир түһүлгэҕэ түмэр улахан тэрээһининэн буолар. Норуоттар икки ардыларынааҕы кытаанах дьүүллүүр сүбэни саха хомуһун ураты тыаһа уонна биир дойдулаахпыт үрдүк маастарыстыбата тута сөхтөрдө уонна биһирэбилин ылла.

Айсен Аммосов бэйэтин кыайыытын кинини уһуйбут учууталыгар, Саха Өрөспүүбүлүкэтин үтүөлээх артыыһыгар Сахаайаҕа анаата: «Өйөбүлүҥ иһин барҕа махтал! Эн көмөҕүнэн уонна эйигин кытта бииргэ номнуо иккис улахан норуоттар икки ардыларынааҕы куонкуруска кыайыылаах таҕыстым!» — диэн артыыс үөрүүтүн үллэһиннэ.

Ону таһынан виртуоз-хомусчут мэлдьи өйүүр-уруйдуур көрөөччүлэригэр, сурутааччыларыгар муҥура суох махталын тиэртэ уонна ситиһии — саха төрүт култууратын уопсай кыайыыта буоларын туһунан бэлиэтээтэ.