Хотугу таһаҕаһы таһыыга уонна уматыгынан хааччыйыыга сүбэ мунньах

Бүгүн Ил Дархан Айсен Николаев хоту таһаҕас таһыытын уонна өрөспүүбүлүкэ муниципальнай оройуоннарын уматыгынан хааччыйыы туһунан сүбэ мунньаҕы ыытта.

Билигин нэһилиэнньэ олоҕор тыын суолталаах таһаҕас таһыытын-тиэйиитин сүрүн түһүмэҕэ бара турар. Арктика навигацията саҕаланна, флот үлэлииргэ бэлэм. Арктика оройуоннарыгар 17 тыһыынча кэриҥэ туонна дизельнэй уматык номнуо ыытылынна.

«Федеральнай биэдэмистибэлэр уонна тириэрдээччилэр (поставщиктар) кыттыыларынан, ньиэп бородуукталарын ирдэнэр кээмэйинэн уонна кэмигэр тиэрдиини хааччыйарга салгыы үлэлииллэригэр сорудахтаатым. Нерюнгри уонна Алдан оройуоннарын уматыгынан хааччыйыыны туспа көрдүбүт. Томмот нефтебаазатыттан атыыланар АИ-95 бэнсиин сууккаҕа атыыланар кээмэйэ 20-35 туоннаҕа диэри, оттон дизельнэй уматык 34-тэн 40 туоннаҕа диэри улаатыннарылынна. Ньиэп бородууктатын саҥа баартыйалара кэллэҕинэ, хааччахтааһыннары хат көрүөхпүт», — диэтэ Айсен Николаев.

Оройуоннары чоҕунан хааччыйыыны эмиэ туспа көрдүлэр. Нэһилиэнньэлээх пууннарга оттугу кэмигэр тиэрдиигэ уонна нуормаланар саппааһы тэрийиигэ бары наадалаах дьаһаллары ылынарга Ил Дархан сорудахтаата. Былааннаммыт кээмэйдэр бары болдьохторугар тиэрдиллиэхтээхтэр. Сылааһы биэрии сезонун эрэллээхтик аһарыы уонна олоҕу-дьаһаҕы хааччыйар систиэмэлэр туруктаах үлэлэрэ мантан олус тутулуктаах.