ИДьМ бэтэрээнэ уонна быраас-кардиолог ууга түһэн, өлө сыспыт киһини быыһаатылар

Бу куйаас күннэргэ Амма улууһун Абаҕатыгар, Харама Хайатын анныгар сөтүөлүү сылдьар дьон ууга түһэн, өлө сыспыт киһини быыһаатылар. Хорсун быһыыны оҥорбут дьонунан ИДьМ бэтэрээнэ Николай Неустроев уонна СӨ 2-с №-дээх Өрөспүүбүлүкэтээҕи балыыһатын  кардиология салаатын кардиолог быраас Вероника Никифорова буоллулар. Бу туһунан Амма улууһун киин балыыһата иһитиннэрэр.

«От ыйын 10 күнүн сарсыардатыгар дьиэ кэргэммитин кытта Харама Хайатыгар өрүскэ сынньана сылдьыбыппыт. Сарсыарда 9 чаас саҕана өрүһү туораары устан иһэр эр киһи тимирэн эрэрин көрбүппүт. Киниэхэ көмөлөһөөрү доҕоро сапбордунан устан тиийбитэ. Дьон бары айманан, ууга киһи тимирэн эрэрин бэйэ-бэйэлэригэр хаһыытаһан биллэрбиттэрэ. Эр киһи ол бириэмэҕэ уу анныгар хаста даҕаны түһэн ылбыта. Биһиги мотуордаах оҥочонон устан тиийэн, бастакы көмөнү оҥорбуппут», — диэн Вероника Егоровна кэпсээтэ.

«Ол бириэмэҕэ эмсэҕэлээбит киһи тыыннаах бэлиэтэ суоҕа. Вероника Егоровналыын тыынар уорганнарын ууттан босхолоон, уочаратынан сүрэҕэр массаас  оҥорбуппут. Уонча мүнүүтэ буолан баран, киһибит салгыны эҕирийэн, тыынан кэлбитэ. Онтон кытылга таһааран, массыынанан нэһилиэк амбулаториятыгар илдьибиттэрэ», — диэн Николай Дмитриевич бэлиэтээтэ.

«Реанимация биригээдэтэ тутатына Абаҕаҕа тахсыбыта. Миэдиктэр эмсэҕэлээбит киһиэхэ наадалаах көмөнү оҥорон баран, Амма улууһун киин балыыһатын реанимациятыгар аҕалбыттара. Билиҥҥи туругунан киһи туруга бигэтик», — диэн бу түгэн туһунан Амма киин балыыһатын кылаабынай бырааһа Михаил Архипов быһаарда.

Хомойуох иһин, СӨ Ыксаллаах быһыыга-майгыга министиэристибэтин дааннайынан, Абаҕа аннынааҕы Амма өрүс сөтүөлүүргэ аналлаах сир буолбатах. Маннык сирдэргэ сөтүөлүүр дьонтон муҥутуур сэрэхтээх буолуу ирдэнэр — ууга өлүү-сүтүү үксүгэр итинник көҥүлэ суох сирдэргэ тахсар.