Икки суукка өрүс таһыгар хоммут, быһаҕынан үҥүү оҥостубут…

Үөһээ Халыма оройуонугар «КАМАЗ» массыына суоппарын быыһаабыттарын туһунан хас да хонуктааҕыта саайтпытыгар суруйан турабыт. «Арктика суоллара» тэрилтэ бу түбэлтэ туһунан сиһилии ТГ-ханаалыгар суруйда. 

Амур уобалаһын олохтооҕо кыһыҥҥы суол сабыллыбытын үрдүнэн айаҥҥа турунан,    «Робинзон Крузо» курдук тыҥааһыннаах балаһыанньаҕа киирэ сырытта. Суоппар Угольнай бөһүөлэгиттэн ыам ыйын 4 күнүгэр айаннаабыт. 70 км  айаннаабытын кэннэ, Утайа (Утая) сэлиэнньэтин таһыгар массыыната алдьаммыт. Онон тиэхиньикэтин хаалларан баран, төттөрү Угольнайга сатыы барарга санаммыт. Кини 50-ча килэмиэтири хааман, сүүрбэччэ килэмиэтир хаалбытын кэннэ,   Зырянка өрүскэ кэлэн хаайтарбыт. Өрүһү сатаан туораабатын өйдөөн, баалкынан быстах кэмҥэ олорор сир оҥостон, икки суукка онно олорбут.  Аһылыга суох буолан, икки быһаҕынан үҥүү оҥостон, бултуу сатаабыт.  Аны кутаа уотугар суоппар атаҕын сиэппит. Дьолго, өрүс таһыгар суотабай сибээс хабан,  112 нүөмэргэ эрийбит.

Олохтоох дьон ыраахтан сылдьар айанньыт хата эһэни көрсүбэтэх эбит диэн сөхпүттэр да, соһуйбуттар да…

Кыһыҥҥы суол сабыллыбыта ырааппыт буолан, быыһыыр үлэҕэ ыарахаттары көрсүбүттэр. Ол да буоллар, суоппары  «Арктика суоллара» тэрилтэ көмөтүнэн,  «Трэкол» вездеходунан быыһаабыттар. Уматыгынан олохтоох дьаһалта хааччыйбыт.

Билигин быыһаммыт эр киһи доруобуйата этэҥҥэ, сотору кэминэн дойдутугар бараары былааннанар диэн «Арктика суоллара» тэрилтэ иһитиннэрдэ.