Ил Дархан быһа эпииригэр 650-тан тахса ыйытыы киирдэ

Муус устар 25 күнүнээҕи туругунан «Быһа лииньийэҕэ» 659 ыйытыы киирбит.

Бу туһунан Саха сиринээҕи эрэгийиэни салайыы киинин (ЦУР) салайааччыта Василий Десяткин иһитиннэрдэ.

—Дьон-сэргэ ордук хаарбах туруктаах дьиэттэн көһөрүү, суол өрөмүөнүн туһунан, өрөспүүбүлүкэ иһинээҕи айаҥҥа субсидиялаах авиабилиэттэри ыйыталлар. Маны сэргэ,  нэһилиэнньэлээх пууннары тупсарыыга, социальнай эбийиэктэри өрөмүөннээһиҥҥэ уонна тутууга эмиэ ыйытыылар киирэллэр. ОДьКХ эйгэтигэр боппуруостары биэрэллэр, ол иһигэр өрөспүүбүлүкэ ОДЬКХ ГУП хамнас бытаарыытын түбэлтэлэрин туһунан чопчулаһаллар. Ыйытыылары ордук Дьокуускай, Ленскэй, Мииринэй, Алдан олохтоохторо биэрэллэрэ бэлиэтэнэр. Итинник элбэх ыйытыы Томпоттон, Үөһээ Халыматтан киирбитэ эмиэ ыйыллар, — диэн этэр Василий Десяткин.

«Быһа лииньийэ» муус устар 27 күнүгэр 19:00 ч. «Саха» НКИХ, «Якутия 24», «Россия 24» телеханаалларга, «Тэтим», «Радио России», «Виктория Саха», «СТВ-радио» уонна Айсен Николаев социальнай ситимнэригэр ыытыллыаҕа.

Быһа эпииргэ Ил Дархан дьон-сэргэ интэриэһиргиир ыйытыыларыгар хоруйдуоҕа, өрөспүүбүлүкэҕэ тирээн турар суолталаах тиэмэлэри дьүүллэһиэҕэ, Саха сирин сайыннарыыга стратегическай хайысхалар уонна саҥа соруктар тустарынан этиэҕэ.

Ыйытыыларгытын: 8 (4112) 506-006 нүөмэргэ эрийэн биэриэххитин сөп. Колл-киин 09:00-18:00 ч. диэри үлэлиир.

Сиһилии: https://www.sakha.gov.ru/news/45723

СӨ Ил Дарханын уонна Бырабыыталыстыбатын пресс-сулууспата