Ил Дархан Дьоруой Николай Кондаков аатынан бириэмийэни туттарда

Бүгүн, Кыайыы уонна Араадьыйа, сибээс үлэһиттэрин күннэрин көрсө, Сэбиэскэй Сойуус Дьоруойа Николай Алексеевич Кондаков аатынан теле-араадьыйа уонна суруналыыстыка эйгэтигэр  судаарыстыбаннай бириэмийэни  туттарыы сиэрэ-туома ыыттылынна.   

— Номоххо киирбит биир дойдулаахпыт пааматынньыгын таһыгар биһиги буойун, суруналыыс, хорсун санаалаах уонна Ийэ дойдутугар бэриниилээх киһибитин ахтан-санаан аастыбыт. Киэн туттан уонна дириҥник ытыктаан туран, Аҕа дойду иннигэр дьиҥнээхтик сулууспалааһын холобурунан буолбут өрөспүүбүлүкэ суруналыыстарын түмсүүтүн икки бэрэстэбиитэлин бэлиэтиибин. 2026 сылга Н.А.Кондаков аатынан Саха Өрөспүүбүлүкэтин Ил Дарханын Бириэмийэтин лауреатынан Иннокентий Тимофеевич Киренскэй – “Саха” ГТРК араадьыйанан биэриигэ сулууспатын начаалынньыга, байыаннай дьайыы кыттыылааҕа буолла. Кини идэтийбит суруналыыс уонна дьиҥнээх патриот.

Эр санааланыы уордьана младшай сержант Алексей Никитич Семеновка олохтон туораабытын кэннэ туттарылынна. “Саха” НКИХ суруналыыһа, “Саха сирэ – Күнтэн күн” бырагыраама ыытааччы-эрэдээктэрэ. Кини бэйэтин баҕа өттүнэн фроҥҥа барбыта, байыас быһыытынан ытык иэһин чиэстээхтик толорбута уонна идэтигэр олоҕун тиһэх күннэригэр диэри бэриниилээҕин көрдөрбүтэ. Алексей Никитич бойобуой сорудаҕы толоро сылдьан хорсуннук охтубута. Бүгүн үрдүк наҕараадата кэргэнигэр Наталья Анатольевна Семеноваҕа туттарылынна, — диэн Ил Дархан Айсен Николаев МАХ ханаалыгар иһитиннэрдэ.

Николай Алексеевич Кондаков аата дьон туһугар чиэһинэйдик үлэлиир-хамсыыр, Ийэ дойдуларын туһугар олорор дьону түмэр. Бу салаа бэтэрээннэригэр, суруналыыстарга, араадьыйа уонна тэлэбиидэнньэ, сибээс үлэһиттэригэр истиҥник махтанабын диэн эбэн эттэ Ил Дархан.