Ил Дархан олохтоох оҥорон таһаарааччылар бородууксуйаларын үрдүктүк сыаналаата

Чурапчы улууһугар үлэтинэн сырыытын кэмигэр Ил Дархан Айсен Николаев Мырылаҕа быыстапка-дьаарбаҥкаҕа сырытта.

Бу  «Чурапчыга чочуллубут» брендынан тэриллибит олохтоох табаары оҥорооччулар тэрээһиннэрэ. Манна сылдьан баран, Айсен Николаев бородууксуйа араас көрүҥүн, хаачыстыбатын үрдүктүк сыаналаата.

Бренд сүрүн сыала-соруга — өрөспүүбүлүкэ иһигэр уонна тас өттүгэр олохтоох оҥорон таһаарааччылар бородууксуйаларын киэҥник тарҕатыы, тыа сиригэр дьоҕус урбаан сайдыытын көҕүлээһин буолар.

—Чурапчы улууһа өрөспүүбүлүкэ агропромышленнай комплексын биир бастыҥ оройуонунан ааҕыллар. Итиннэ көхтөөхтүк үлэлиир урбаанньыттар түмсүүлэрэ кырата суох оруолу ылар. Маныаха биһиги уопсай сорукпут — олохтоох тыа хаһаайыстыбатын оҥорон таһаарааччыларын табаардарын соҕурууттан арктикаҕа диэри бары оройуоннар олохтоохторугар тиийэрин курдук оҥоруу, — диэн Ил Дархан бэлиэтиир.

Быыстапкаҕа бэйэлэрин бородууксуйаларын тыа хаһаайыстыбатын кэпэрэтииптэрэ, биирдиилээн урбаанньыттар уонна оскуолалар аҕалан билиһиннэрдилэр. Олор ортолоругар «Чурапчы», «Эргис» ТХПК, «Эрэл»СППК курдук биллэр-көстөр үлэлээх оҥорон таһаарааччылар бааллар. Кинилэр бэйэлэрэ астаан таһаарар  бородууксуйаларын, эттэн, үүттэн астарын-үөллэрин арааһын, ол иһигэр Чурапчы бурдугуттан бурдук ас арааһын, сир аһыттан бэлэмнээбит барыанньаларын, чэйдэрин, мүөттэрин быыстапкаҕа аҕалбыттар.

Олохтоох оҥорон таһаарааччылары уонна уус-уран оҥоһуктар маастардарын өйүүр сыалтан, ону тэҥэ табаардарын, бородууксуйаларын ханна да куоталаһар кыаҕын үрдэтэр туһуттан, 2026 сыл Чурапчы оройуонугар Олохтоох оҥорон таһаарыы сылынан биллэриллибитэ.

«Нэһилиэктэр талааннаах дьоҥҥутун, маастардаргытын, оҥорон таһаарааччыларгытын ааттарын-суолларын, дьарыктарын, ситиһиилэрин сурукка киллэриҥ. Холобур, аҕыйах сыллааҕыта оҥоһуллубут испииһэгинэн аҕыйах дьон баара, билигин маастардар, оҥорон таһаарааччылар кэккэлэрэ хаҥаабыта саарбаҕа суох»,—диэн  Чурапчы улууһун култуура управлениетын начаалынньыгын солбуйааччыта Сусанна Дмитриевна эттэ.

Үлэ РФ Бэрэсидьиэнэ Владимир Путин көҕүлээбит «Эффективная и конкурентная экономика» национальнай бырайыак сыалын-соругун толорууга туһуланар.

Сиһилии: https://www.sakha.gov.ru/news/59707

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, ЯСИА