Ил Дархан «Якутия, вперед!» биэриигэ от ыйын түмүктэрин таһаарыаҕа

Бүгүн, атырдьах ыйын 3 күнүгэр, «Якутия 24», «Саха» НКИХ ханаалларга уонна «Тэтим» араадьыйаҕа  «Якутия, вперед!» биэрии саҥа таһаарыыта тахсыаҕа.

Эфиргэ Ил Дархан  Айсен Николаев от ыйын түмүктэрин таһаарыаҕа уонна сүрүн тэрээһиннэр тустарынан кэпсиэҕэ. Киин болҕомтоҕо — Арассыыйа Бэрэсидьиэнэ Владимир Путины кытта көрсүһүү уонна Арассыыйа Бырабыыталыстыбатын Бэрэссэдээтэлэ Михаил Мишустин Саха сиригэр оробуочай  сырыытын түмүктэрэ.

Баһылык ойуур баһаардарын билиҥҥи  туругун, Үөһээ Дьааҥы улууһугар халаан содулун туоратыыны, эмсэҕэлээбит дьоҥҥо көмөнү оҥорууну уонна инфраструктураны чөлүгэр түһэриини туспа бэлиэтиэҕэ. Ону сэргэ өрөспүүбүлүкэ баһылыга уматыгынан хааччыйыы,  тыа хаһаайыстыбатын оҥорон таһаарааччылары өйүүр дьаһаллар тустарынан кэпсиэҕэ.

Эфир «Якутия 24» ханаалга уонна «Тэтим» араадьыйаҕа — киэһэ 20:30 чааска, «Саха» НКИХ ханаалга — киэһэ 21:00 чааска тахсыаҕа.