ВЭФ сүрүн тиэмэтэ: “Уһук Илин – дьон этэҥҥэ буоларын туһугар сайдыы”

Илиҥҥи экэнэмиичэскэй пуорум Владивостокка  балаҕан ыйын 1-4 күннэригэр,  үгэс курдук,  Уһук Илиҥҥи федеральнай университет кампуһун былаһааккатыгар ыытыллыаҕа. Пуоруму  Росконгресс пуонда  РФ Бырабыыталыстыбатын өйөбүлүнэн тэрийэр. Официальнай саайтка дьыалабыай бырагыраама бэчээттэннэ.

ВЭФ сүрүн тиэмэтэ: “Уһук Илин – дьон этэҥҥэ буоларын туһугар сайдыы”

РФ Бырабыыталыстыбатын бэрэссэдээтэлин солбуйааччы – Уһук Илин федеральнай уокуругар  РФ Бэрэсидьиэнин боломуочуйалаах бэрэстэбиитэлэ, ВЭФ тэрийэр кэмитиэтин бэрэссэдээтэлэ Юрий Трутнев бэлиэтээн эппитинэн, Илиҥҥи экэнэмиичэскэй пуорум Уһук Илин социальнай-экэнэмиичэскэй сайдарыгар  көдьүүстээх  үнүстүрүмүөннэртэн  биирдэстэринэн буолла.

“Пуорум ыытыллар бастакы сылларыгар сүрүн соруктар эрэгийиэн экэниэмикэ өттүнэн өрө тахсарыгар: баар тэрилтэлэри модернизациялааһыҥҥа уонна саҥа тэрилтэлэри тутууга, эрэгийиэҥҥэ технологиялары тардыыга,  үрдүк таһымнаах оробуочай миэстэлэри таһаарыыга хайысхаламмыттара.  Судаарыстыба өйөбүлүнэн, Уһук Илиҥҥэ уонна Арктикаҕа  7 триллион кэриэтэ  инвестиция тардылынна, 197 оробуочай  миэстэ  тэрилиннэ. Эбии анал үнүстүрүмүөннэр олоххо киллэрилиннэр: Уһук Илиҥҥи уонна Арктика ипотеката, “Гектар” бырагырааманан сири босхо биэрии. Арассыыйа бэрэсидьиэнин сорудаҕынан Уһук Илин 25 уонна Арктика 15 тирэх куораттарын киэҥ хабааннаахтык реновациялааһын ыытыллар. Бу барыта Уһук Илин уонна Арктика үлэлииргэ уонна олорорго табыгастаах сиринэн-уотунан буоларын туһугар оҥоһуллар. Илиҥҥи экэнэмиичэскэй пуорумҥа туох ситиһиллибитин уонна чугастааҕы кэмҥэ тугу үлэлиэхтээхпитин дьүүллэһиэхпит”, — диэтэ Юрий Трутнев.

СӨ Ил Дархана Айсен Николаев эппитинэн, Илиҥҥи экэнэмиичэскэй пуорум – Уһук Илин атын субъектарыгар курдук, Саха сиригэр сүрүн экэнэмиичэскэй пуорум.

Пуорум биһиэхэ, биллэн туран, олус суолталаах уонна наадалаах. 10 пуорум устата Саха сирин экэнэмиэкитигэр 1 триллионтан тахса солкуобайы киллэрбит элбэх сөбүлэһии түһэрсиллибитэ. Уонунан тыһыынча үлэ миэстэтэ таһаарылынна, оҥорон таһаарар улахан эбийиэктэр, энергетика уонна тырааныспар инфраструктурата тутулуннулар”, — диэтэ  Айсен Николаев.

ВЭФ-2026 дыалабыай бырагыраамата 5 тиэмэлээх тректэн турар: “Уһук Илиҥҥэ олоруохха уонна үлэлиэххэ”, “Чааһынай инвестициялары тардыы мэхэниисимнэрэ, “Билиҥҥи уонна кэлэр кэм технологиялара”, “Экэниэмикэ улаатарыгар логистика уонна инфраструктура”.

Ону таһынан аһаҕас пленарнай сиэссийэлэр, дьыалабыай оонньуулар, куонкурустар, араас пуорумнар ыытыллыахтара.

СӨ Ил Дарханын уонна бырабыыталыстыбатын пресс-сулууспата