Илиҥҥи пуорумҥа «ВОИН» киин «куората» баар буолуоҕа

«ВОИН» киин Илиҥҥи экэнэмиичэскэй пуорум чэрчитинэн ыытыллар «Уһук Илин уулуссата» быыстапкаҕа бэйэтин павильонун билиһиннэриэҕэ. Экспозиция ыалдьыттара бастакы көмөнү оҥоруу албастарын үөрэтиэхтэрэ, БПЛА-лары ытар  VR-симуляторы боруобалыахтара, пилота суох аппарааттар оператордарынан буолуохтара. Быыстапканы  бэрэсидьиэн Уһук Илиҥҥи федеральнай уокурукка боломуочуйалаах бэрэстэбиитэлин аппараатын өйөбүлүнэн, «Росконгресс» пуонда тэрийэр.

Былаһааккаҕа 600 квадратнай миэтэрэ иэннээх киэҥ далааһыннаах байыаннай-спортивнай «куорат» үлэлиэҕэ, манна Киин инструктордара уонна курсааннара үөрэтии араас хайысхаларынан маастар-кылаастары ыытыахтара. Павильон дьиссипилиинэлэринэн арахсар: уотунан бэлэмнэнии, тактическай мэдиссиинэ, беспилотник систиэмэлэрин туһаныы, инженернэй дьыала уо.д.а.

«Арассыыйа бэрэсидьиэнэ Владимир Владимирович Путин сорудаҕынан, төрөөбүт дойдуларын таптааччылар эрэ буолбакка, кинини араас кутталтан көмүскүүр кыахтаах патриоттары — үүнэр көлүөнэни иитэр сыаллаах «ВОИН» киин тэриллибитэ. Билигин Киин филиала 21 эрэгийиэҥҥэ баар. Олортон биэһэ — Уһук Илиҥҥэ. Бу сылга өссө үс филиал арыллыаҕа, ол иһигэр Приморскай кыраайга. «ВОИН» киин төрдүс сылын субуруччу Илиҥҥи экэнэмиичэскэй пуорумҥа кыттар. Былырыын Киин павильона «Уһук Илин уулуссатыгар» бастыҥ идэлээх истиэндэнэн билиниллибитэ.

Быйылгы маастар-кылаастар бырагыраамалара өссө араас өрүттээх уонна баай ис хоһоонноох буолуоҕа — тактическай мэдиссиинэттэн снайпиҥҥа диэри. Ыалдьыттар Уһук Илиннээҕи филиаллар үлэлэрин туһунан сиһилии билиэхтэрэ, аныгы үөрэтэр тэрилй боруобалыахтара уонна оҕолорун үөрэх бырагыраамаларыгар суруттарыахтарын сөп», — диэтэ Арассыыйа бырабыыталыстыбатын бэрэссэдээтэлин солбуйааччы — бэрэсидьиэн Уһук Илиҥҥи федеральнай уокурукка боломуочуйалаах бэрэстэбиитэлэ, Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ уонна «ВОИН» киин сэбиэтин бэрэссэдээтэлэ Юрий Трутнев.

Тактическай мэдиссиинэ зонатыгар ыалдьыттар бастакы көмөнү оҥоруу сүрүн сатабылларын үөрэтиэхтэрэ. Кыттааччылар аныгы «Леонардо» робот-манекеҥҥа сүрэх-тыҥа реанимациятыгар, интерактивнай манекен-симуляторга бааһырбыт киһини эвакуациялыырга, улахан киһи уонна оҕо манекеннарыгар Геймлих ньыматыгар үөрэниэхтэрэ. Ону таһынан, ыалдьыттар жгуттарынан эбэтэр турникеттарынан хаан барыытын тохтотуохтара.

«Беспилотник систиэмэлэри туһаныы» хайысха симулятордарынан уонна дроннарынан көрдөрүллүөҕэ. Ыалдьыттар тренажер-симуляторга виртуальнай  аппарааты салайан көрүөхтэрэ, оттон дьиҥнээҕи анал миэстэҕэ боруобалыахтара. «ВОИН» киин былаһааккатыгар аан бастаан  дроны көтүтүөххэ уонна БПЛА-ны илиинэн хомуйуохха сөп. Быйылгы өссө биир сонун — БПЛА-лары ытар VR-симулятор. Бу зонаҕа  толору Арассыыйаҕа оҥоһуллар «Квадросим» дрон көтүүтүн симулятора туһаныллыаҕа.

«Калашников» ГК уонна Арассыыйа Бойобуой снайпинын федерациятын кыттыыларынан, уотунан бэлэмнэнии зоната тэриллиэҕэ. Манна кыттааччылар АК-12, АК-74М аптамааттар уонна Макаров бэстилиэтин маассабай-габаритнай муляжтарын ыһарга-хомуйарга эрчиллиэхтэрэ. Ону таһынан ыалдьыттар электроннай ситимэ суох тренажерынан ыраах дистанцияҕа ытыы сатабылларын уонна поппер-мээчиктэргэ түргэн ытыыны бэрэбиэркэлиэхтэрэ.

«Уһук Илин уулуссатын» аһаҕас күннэригэр балаҕан ыйын 5–7 күннэригэр «ВОИН» киин павильонугар дьиҥнээх пневматическай тир үлэлиэҕэ.

Өссө биир дьарык уулуссаҕа баар буолуоҕа. Бу «миинэлээх хонуу» — инженернэй бэлэмнэнии сатабылларын эрчийэр интерактивнай зона. Кыттааччылар металлоискатели туһанан, өстөөх уура сылдьыбыт миинэлэрин булуохтара.

Быыстапка былаһааккатын иккис сылын субуруччу Арассыыйа Бойобуой искусстволарын сойууһа партнердаан эрэр. РСБИ тренердэрэ уонна спортсменнара национальнай бойобуой искусство көрүҥнэринэн маастар-кылаастары ыытыахтара.

Ону таһынан, былаһааккаҕа оборуона бырамыысыланнаһын ситиһиилэрин быыстапката тэриллиэҕэ. Былырыыҥҥы курдук, манна «Патриотическай»  ТОР бородууксуйата уонна «Калашников» ГК оборудованиета көрдөрүллүөҕэ. Экспонаттар ортолоругар аныгы снегоболотоход, электроэндуро, инновационнай БПЛА, сэбилэнии маассабай-габаритнай муляжтара уо.д.а. бааллар.

XI Илиҥҥи экэнэмиичэскэй пуорум балаҕан ыйын 1–4 күннэригэр Владивосток куоракка Уһук Илиҥҥи федеральнай университет кампуһун былаһааккатыгар ыытыллыаҕа. Бу күннэргэ быыстапка пуорум кыттыылаахтарыгар анаан үлэлиэҕэ, оттон балаҕан ыйын 5-7 күннэригэр ким баҕалаахха барыларыгар аһаҕас буолуоҕа.

ВЭФ тэрийээччитинэн Арассыыйа Бырабыыталыстыбатын өйөбүлүнэн «Росконгресс» пуонда буолар. «ВОИН» киин Саха сиринээҕи филиала икки сыл иһигэр 4 тыһыынчаттан тахса курсааннары бэлэмнээтэ. Бу кэм устата филиал өрөспүүбүлүкэҕэ ыччаты байыаннай-патриотическай иитии сүрүн былаһааккаларыттан биирдэстэригэр, ону тэҥэ дойдуну көмүскээһин уонна куттал суох буолуутун төрүттэригэр педагогтары бэлэмниир кииҥҥэ кубулуйда. Манна эрэгийиэн үөрэх тэрилтэлэрин 586 преподавателэ үөрэннэ.

«Биһиги өрөспүүбүлүкэбитигэр Киин салаата 2024 сыл муус устарга аһыллыбыта. Бүгүн Арассыыйа уонна өрөспүүбүлүкэ байыаннай-спортивнай бэлэмнэниитин уонна патриотическай иитии тиһигин «ВОИН» киинэ суох сатаан санаабаккын. Бу — уолаттар быһаарыыны ылынарга, уустук быһыыга-майгыга дьаһанарга уонна бэйэлэрин норуоттарыгар уонна дойдуларыгар эппиэтинэһи сүгэргэ үөрэтэр майгы-сигили уонна күүс-уох дьиҥнээх оскуолата», — диэн Саха сирин Ил Дархана Айсен Николаев бэлиэтээтэ.

Сиһилии: https://www.sakha.gov.ru/news/57296